Çärşämbe könne Mäskäwneñ Lujniki sport kompleksında Rusiä Prezidentı Vladimir Putinnı yaqlap Ğömümrusiä cıyını uzdı. Älege çarada Putin üze dä qatnaştı häm yalqınlı çığış yasadı. Moña qädär Putin tarafdarları zurlap 15 nöyäber könne Tverdä cıyılğan inde. Ul çaqta “Putin tarafdarları” xäräkätneñ berençe cıyını ütte. Älege xäräkät yaña ğına oyışsa da tiz arada üseş aldı.
Töbäklärdän wäkillär çaqırıla, Putinnı yaqlap törle cıyınnar uza. Däwlät yaqlawınnan başqa ğına tiz arada mondıy çaralarnı uzdıru, bilgele mömkin tügel. Mäskäwdä ütkän cıyın da aldan oyıştırılğanlığı belän cälep itte.
Rusiä Prezidentı Vladimir Putinnıñ çärşämbe könne üzen yaqlap uzdırılğan Ğömümrusiä cıyınında qatnaşuı, andağı yalqınlı çığışı, 5 meñgä yaqın xalıqnıñ oyışqan töstä şiğärlär qıçqırıp toruı Sovet zamanındağı cıyılışlarnı xäterlätte. Mäskäwneñ Lujniki sport kompleksında oyıştırılğan bu cıyında Putin kilgänçe 70-80nçe yıllar köyläre yañğıradı, ayırım alğanda Komsomol cırları işetelde, Rusiäneñ törle töbäklärennäni kilgän wäkillär “Tula – Putin öçen”, “Yamal töbäge Putin öçen” digän şiğärlär totıp tordı. Bu cıyın aldan oyıştırılğanlığı belän cälep itte. Tieşle cirdä qayber keşelär oyışqan töstä kümäk qıçqırular oyıştırdı. Säxnä zurlap Rusiä bayrağı räweşendä yasalğan ide. “Putinnıñ ciñüe – Rusiäneñ ciñüe”, “Bez Rusiägä ışanabız” kebek yazular çat sayın iğtibarğa taşlandı.
Prezident Putin aldan farazlanğança saylawlar turında söyläde, ayırım alğanda Berdäm Rusiä firkäse öçen tawış birergä çaqırdı. Vladimir Putin: ÄBiregä barlıq töbäk wäkilläre cıyılğan. Törle yäştäge törle hönär keşeläre, törle qaraşta bulğannar. Bez bügen bergä Berdäm Rusiäne yaqlar öçen cıyıldıq.
Putin üz çığışında dekäberdäge dumağa saylawlar kiläse yılnıñ martında uzaçaq Rusiä Prezidentı saylawları belän bäyle buluın äytte. Vladimir Putin:
"2 dekäber könne Rusiä Däwlät Dumasına uzaçaq saylawlar ilneñ kiläçäge öçen bik möhim. Bu yaña Parlamentnıñ Rusiä üseş ala barğan çorda, inde bilgelängän ilküläm proektlarnı tormışqa aşıruı belän genä bäyle tügel. İñ möhime bu saylawlar Rusiä ilbaşı saylawları aldınnan berniçä ay alda ğına uza. Ägär dekäberdä ciñülär bulsa, bu inde martta Rusiä Prezidentın saylawlarda da ciñü digän süz."
"2 dekäber könne Rusiä Däwlät Dumasına uzaçaq saylawlar ilneñ kiläçäge öçen bik möhim. Bu yaña Parlamentnıñ Rusiä üseş ala barğan çorda, inde bilgelängän ilküläm proektlarnı tormışqa aşıruı belän genä bäyle tügel. İñ möhime bu saylawlar Rusiä ilbaşı saylawları aldınnan berniçä ay alda ğına uza. Ägär dekäberdä ciñülär bulsa, bu inde martta Rusiä Prezidentın saylawlarda da ciñü digän süz."
Mäskäwneñ Lujniki sport kompleksında cıyında Putin xalıqnı iñ borçığan mäsälägä tuqtaldı. Ul sosial' xälneñ yaxşıruın, xezmät xaqlarınıñ 3 tapqırğa kütärelüen , ülüçelärgä qarağanda tuuçılar sanınıñ soñğı yılda artuın äytte. Kiläçäktä bolay barsaq Rusiäneñ iqtisadi xäle zur üseş alaçaq dide Rusiä Prezidentı:
"Ägär Rusiädä xäzerge üseş yünäleşe däwam itsä - iqtisad şulay alğa barsa, 10 yıl öçendä Rusiä iqtisadi yaqtan üseş alğan 5lekkä kerergä mömkin. Häm bez monı eşliaçäkbez."
Vladimir Putin kiläse aylarda däwlätneñ citäkçelege tulısınça yañaraçaq. Häm bu yañaru tieşle räweşle uzsın öçen, yäğni Prezident belän Parlament bergäläp faydalı eşli alsın öçen bezgä barı ciñü kiräk dip belderde. Putin turıdan-turı “Berdäm Rusiä” öçen tawış birergä çaqırdı.
Putin tarafdarları xäräkäte wäkilläre xäzer Rusiäneñ härber töbägendä bar. Ul oyışmalarnıñ küpçelege cirle xakimiat yärdämendä oyışa.