Accessibility links

Кайнар хәбәр

İran prezidentı: AQŞ xisabı – bezneñ ciñü


Mäxmüt Äxmädinecat İlam şähärendä xalıq aldında çığış yasıy, 5.12.2007
Mäxmüt Äxmädinecat İlam şähärendä xalıq aldında çığış yasıy, 5.12.2007

AQŞnıñ yaña küzläw xisabıında İran üzeneñ atom qoral programın 4 yıl elek tuqtatqan, digän näticä yasalğan. Rusiä belän Qıtay bu xisap İran tiräsendäge wazğiätne üzgärtä disä, Könbatış illäre - ällä ni üzgäreş kürmi.

Amerikan küzläwçeläreneñ, İran üzeneñ atom qoral programın inde 4 yıl elek tuqtatqan, digän "ütä yäşeren" xisabı matbuğat bitlärenä düşämbedä taraldı.

Bu näticä Quşma Ştatlarnıñ, Britaniä häm Fransiä belän bergä, İranğa yaña, inde öçençe çikläwlärne äzerläp yatqan waqıtqa turı kilde.

Berençe ike çikläwgä dä telämiçä genä quşılğan Rusiä belän Qıtay amerikannarnıñ bu xisabın şunduq eläkterep aldı.

"İminlek şurasınıñ yaña qararın tikşergändä bez, älbättä, Quşma Ştatlarnıñ İranda yäşeren qoral programı yuq digän açıqtan-açıq belderüen iskä alaçaqbız" dide çärşämbedä Mäskäwdä Rusiäneñ tışqı eşlär ministrı Sergei Lavrov.

Sişämbedä Qıtaynıñ BMOdağı ilçese Wang Guangya, minemçä, xäzer İminlek Şurası äzğaları wazğiätneñ üzgärüen tanırğa tieş, dide.

Ämmä Amerikan prezidentı George Buş fikerençä, bu yaña xisap İrannıñ qurqınıçı betüen añlatmıy.

"Min bu xisapnı kisätü dip qabul itäm. Alar programın tuqtatqan, dimäk ul bulğan, dimäk alar anı yañarta da ala. Monıñ öçen urannı bayıta belü citä" dide amerikan prezidentı.

Räsmi Tähran isä, kiresençä, xisapnı atom qoralın yasamawına dälil dip atadı. "Bezneñ atom programı başınnan uq tınıç ide, kiläse xisaplar äle monı kürsäter" dide İrannıñ atom söyläşülärendä töp wäkile Säet Cälili.

İran prezidentı Mäxmüt Äxmädinecat isä ğomümän xisapnı ciñü dip atadı. "Xaqiqättä, amerikannarnıñ bu xisabı İran xalqınıñ atom mäsäläsendä ciñüen añlata" dide ul İlam şähärendä xalıq aldında çığış yasap.

Rusiä belän Qıtay yaña çikläwlär turında närsä äyter älegä bilgesez. Ä menä Könbatış illäre İranğa basımnı däwam itergä çaqıra.

Britaniä häm Germaniä räsmiläre, bu xisap näq menä Könbatışnıñ "qamçı belän qalca" säyäsäteneñ näticäle buluın kürsätä, dide. Fransiä İminlek Şurasınıñ yaña qararın äzerlärgä çaqırdı.
XS
SM
MD
LG