Accessibility links

Кайнар хәбәр

Ni öçen näq menä Medvedev?


Kem monda prezident?
Kem monda prezident?

Putin prezidentlıqtan kitkäç kem bulır digän sorawğa, nixayät, açıqlıq kerde diärgä bula. Uğzan ayda Berdäm Rusiä firqäse qorıltayında Vladimir Putin, prezident urınına layıqlı keşe tabılsa, üzeneñ premier bulıp qalu ixtimalın äytkän ide. Dimäk, andıy keşe tabıldımı?


42 yäşlek Dmitriy Medvedev – Putinnıñ iñ yaqın yärdämçeläreneñ berse sanala ide. Tawışın berqayçan da kütärmi, şaw-şulı belderülär yasamıy, armıy-talmıy eşli, Kremldä anıñ "wäzir" digän quşamatı bulğan.

Putinnıñ yaqtaşı ğına tügel, Peterburnıñ, şul uq yuridik fakultetında uqığan. Uqıtuçıları äytüenä qarağanda, ul student çaqta uq bik tırış bulğan.

Sovet çorında sudentlarnı kolxozğa bäräñge alırğa cibärü ğädäte bar ide. Başqa studentlar eşlämiçä, käyef-safa qılıp yatqanda, Medvedev qulına köräk alıp, bäräñge qazıy torğan bulğan.

Uquın betergäç, äti-änise - uqıtuçılar yulın saylap, disrtatsiä yaqlağan, universitetta xoquq uqıtqan. Läkin soñnan şähär idaräseneñ tışqı bäyläneşlär komitetına kiñäşçe itep alınğan. Bu komitetnıñ citäkçese – Vladmir Putin isemle keşe bulğan. Şunnan birle alar 17 yıl bergä.

"Putin aña abıy kebek, anı üzeneñ enese dip qarıy, aña ilne tapşırıp bula dip sanıy. Ul baş tormışı öçen Putinğa räxmätle" di Heritage Foundation üzägeneñ Mäskäw citäkçese Yevgeniy Volk.

1999 yılda Medvedev Mäskäwgä kilä. Putinnıñ saylaw-aldı kompaniäsen citäkli. Perzident bulğaç Putin anı prezident idaräse başlığınıñ urınbasarı itä. Gazpromda direktiorlar şurası räise urının birä. Bügenge köndä ul däwlätküläm programmalar öçen cawpalı berençe vitse-premier. Putinnıñ yaqın tirälegendä KGB belän bäyläneşe bulmağan berdän-ber keşe sanala. Üzen Yewropa qaraşlı, bazar iqtisadı tarafdarı, dip tanıta.

Eşlär Kreml telägänçä barsa, 3 aydan Medvedev prezident bulaçaq, häm anıñ wäkälätläre premier Putinnıqınnan küpkä zurraq bualaçaq:

"Konstitutsiä nigezendä Rusiä prezidentınıñ wäkälätläre bik zur. Gubernator saylawların beterep, mäğlümät çaraların buysındırıp, Putin alarnı tağı da arttırdı. Medevedev prezidentlıq belän bergä ğayät zur xakimiät alaçaq" di säyäsät belgeçe Yevgeniy Volk.

Şul säbäple, Yevgeniy Volk süzlärençä, 17 yıllıq duslıqlarna qaramastan, Medvedev, axır çiktä, abıysı sızğan yuldan taypılırğa da mömkin. Çönki säyäsättä tulı buysınu bulalmıy, wazğiät alışına, wäğdälär onıtıla, keşelär üzgärä, di ul.

Läkin küzläw belgeçe bulğan Putin mondıy ixtimalnı ğına küz allağan bulırğa tieş. Xäzer anıñ Dumada konstitusion küpçelege bar. Qanunnarnı niçek kiräk, şulay üzgärtep bula. Rusiädä xakimiät tözeleşe - başqa illärdäge şikelle - köçle premier, zäğif prezident räweşendä üzgärtelergä mömkin.
XS
SM
MD
LG