Accessibility links

Armiädän saqlan!


Armiädän saqlan!

Bu atnada Buada bulğan qotoçqıç waqığalar başqa säyäsi wä mädäni çaralarnı külägädä qaldırdı. Pänceşämbedä eçke eşlär ministrlığında älege tragik xällärne yabıq işeklär artında tikşerdelär. Ğäcäp, läkin çäçlärne ürä torğızğan bu waqiğa turında kiñ cämäğätçelekkä, xätta jurnalistlarğa da, räsmi añlatular bulmadı diärlek. Teleekranda ber sekundqa kürenep alğan ministr Äsgät Säfärov «bezneñ yuğaltular militsiä xezmätkärläreneñ cinayätçelärne atıp üterergä psixologik yaqtan äzer tügellegenä bäyle»,- dip añlattı.

İke kön eçendä 12 keşene qırıp salğan wäxşilärneñ qanlı ğamäleneñ mantiğına töşenergä teläwçelär işäyä bara. Şul uq tizlek belän bez, küräseñ, çınbarlıqtan da yıraqlaşabızdır. Çönki üterüçelär çın maqsatların üzläre belän qabergä alıp kittelär. Niçek kenä bulmasın, xärbilär, militsiä xezmätkärläre älege waqiğadan tieşle sabaqnı tizräk alsınnar ide.

Elitalı xärbi bülektän bernindi totqarlıqsız avtomatlar häm patronnar kütärep çığıp kitü genä dä bügenge armiäneñ xäle turında küp närsäne söyli. Älege 31-nçe brigadanıñ elekkege komandirı Sergey Kapustin süzlärenä qarağanda, xärbi komissariatlar çaqırılış sayen biregä qayçaq 70-är cinäyätçene cibärä torğan bulğannar. Ğadättä, andıy keşelärne elita ğaskärläre tärbiäli almıy, alar üzläre desantnçılarğa tieşle «tärbiä» birergä sälätle adämnär bulıp çığalar.

Tağın şunısı da bar: xäzerge balalar täpi yöri başlağanda uq televizordan atu, üterü, cäberläw filmnarın kürep üsälär, Rembo, Terminator bulırğa xıyallanalar. Xäyer, armiädä dä şul uq tärbiäwi filmnarnı köne-töne äyländerälär. Citmäsä, inde niçämä yıl xärbilär qansızlıq, räximsezlek däreslären ekrannan ğına tügel, tormıştan da öyränälär. Yıraq barası yuq: Çeçnyada çın-çınlap grajdannar suğışı däwam itä. Anda inde ber-beren alıştırıp meñlägän xärbilär «batırlıq» mäktäben tämamladılar. Kem belä, bälkem, Ulyanovski desantnçıları da älege mäktäpne uzuçılardan qanlı hönärgä öyrängännärder.

Qısqası, Konstitutsiä buyınça ilen, xalqın saqlarğa tieş bulğan armiä bügen qoralsız keşelärgä yanawçı qurqınıç ber oyışmağa äwerelep bara.
XS
SM
MD
LG