Rusiäneñ Üzäk federal' okruğında Milli eşlär buyınça Şura oyıştırıla

İnde milli eşlärgä kilsäk, Rusiädä millätlär ministrlığı bulmasa da, anıñ ministrı Vladimir Zorin bar. Häm millät tiräsendä törle ğämällär tuqtalmıy. Elegräk Vladimir Putin qarşında tatarlar buyınça ber sovet tözelü turında xäbär çıqqan ide. Mondıy sovet räsmi räweştä niçek häm küpme eşlär, anısı turında xäbär yuq. Ämmä, Rusiä prezidentınıñ Üzäk federal' okrug apparatınnan Qazanğa ber xat kilde. Mäskäw tiräsendäge şuşı okrug üzeneñ millät häm etnik mäsälälär buyınça sovetın buldıra ikän. Yäğni, milli säyäsät federal' üzäktä dä praktik ğämälgä küçmi, federatsiä subyektlarında da -- ni tegeläy, ni bolay. Şuña kürä, federal' okrug däräcäsendä dä millät ğarmunın uynatıp qararğa cıyınalar. Kemnär xäl itär soñ milli mäsäläne? Mäskäw tiräsendäge federal' okrugtağı Şurağa tatar milli avtonomiäseneñ 4 keşese çaqırıla. Bu sovetqa kerügä Mäskäw avtonomiäse wäkilläre dä, Tatarstannıñ Mäskäwdäge wäkile Mirixanov ta däğwa itä ikän. Ä Tatarstan respublikası, bigräk tä İndus Tahirov citäklägän federal' milli-mädäni avtonomiä, bu sovetqa kemne täqdim itär ikänlege xäzergä açıqlanmağan. Şunısı ap-açıq. Federal' okruglarda real' iqtisad dilbegäläre bulmasa da, mäğlümät, säyäsät eşlärendä okrugnı mömkin qädär yışraq qullanırğa omtılış bar. Okruglar şäbäysä, respublika, ölkälärneñ däräcäse kimi bara.