Bötentatar ictimağıy üzägeneñ VII Qorıltayı ütte

Bötentatar ictimağıy üzägeneñ (BTİÜ) düşämbe könne ütkän VII Qorıltayı oyışqanlıq belän, kütärenke ruxta açıldı. Qorıltayğa saylanğan 608 delegatnıñ 579, çaqırılğan 298 qunaqnıñ 241 kilde, dip iğlan itelde. Ğaliäskär Kamal teatrınıñ tamaşa zalı tulı bulğaç, berdämlek, kütärenkelek ruxı belän suğarılğan ide. Üzäk räise Räşit Yağfärov xisap notığın şuşı berdämlek, oyışqanlıq belän täbrikläwdän başladı. Berençe tänäfeskä qadär şuşı kütärenkelek, berdämlek ruxı saqlandı.