Accessibility links

Кайнар хәбәр

1 000 000 yaña pasport…


1 000 000 yaña pasport…

Düşämbe könne, Ximiklar mädäniät sarayında 1 millionınçı yaña pasportnı tapşıru yolası ütkärelde. Tatarstanda 3 millionlap keşe yaña tanıqlıq alırğa tieş. Xäzergä bu eşneñ 1/3 öleşe genä başqarılğan. Eçke eşlär ministrlığınıñ pasport häm viza idäräse citäkçese Galina İvanovna Fäxretdinova fikerençä, Tatarstannıñ östämä vkladışları Rusiä xökümäte tarafınnan nığıtılğan häm bernindi dä qarşılıqqa oçrarğa tieş tügel. “Komsomol'skaya pravda v Tatarstane” gazetası xäbärçese sorawına ul şundıy cawap birde. Galina Fäxretdinova, Tatarstannıñ östämä bitläre Mäskäwdä qunaqxanägä urnaşırğa yäki poezdğa bilet alırğa qomaçawladı, digän xäbärlärgä ışanmıy. Bu ayırım mäğlümät çaralarınıñ maxsus räweştä yalğış fiker taratu näticäse, dide ul. Çınnan da, Tatarstan gerbı töşkän häm tatarça isem, familiä yazılğan vkladıştan baş tartu mömkinlege turında maxsus reportajlarnı “Efir” telekompaniäseneñ “Gorod” programması başlap cibärgän ide. Bu kampaniäneñ maqsatı – Tatarstannıñ Däwlät simvollarına, milli üzençäleklärenä tiskäre mönäsäbät tärbiäläw. Kiräkmägän vkladışnı nigä alırğa, yänäse. Dimäk, Tatarstan digän respublikanıñ da kiräge şul qädär genä bulıp çığa.

Älege propagandistik kampaniägä yäkşämbe könne Tatarstan däwlät televideniäeseneñ “İtogi nedeli” tapşıruı da üz öleşen kertte. Şuşı tapşırunıñ rejisserı, İgor isemle yeget, Qazannıñ Mäskäw rayonı militsiä bülegendä pasportın alıştırğan çaqta, maxsus reportaj töşergän. Bu yeget fotoräsemgä yılmayıp töşkäç, şul räsemne pasportqa yabıştırırlarmı ikän, dip qızıqsınğan. Artıq tanımaslıq itep awız yırılmağaç, yılmayğan çıraylı räsem töşkän pasportnı birgännär. Ämmä, Tatarstan vkladışın almas öçen televidenie rejisserına maxsus ğariza yazırğa turı kilgän. Citmäsä, 10 sum aqça da artıq alınğan. Şunıñ belän däwlät televideniäse Tatarstan däwlät simvolları töşkän östämä bitlärne almaw mömkin häm urınlı digän propaganda yasadı. Monıñ öçen artıq aqça alınmasqa tieş, digän täläp tä şunda quyıldı. Televidenie rejiesserı İgor üze Volgograd ölkäsendä tuğan bulğan. Yäğni, Tatarstan anıñ öçen ğaziz häm izge urın tügel. Qayber grajdannarğa Tatarstanda yäşäw räxätlek häm ğorurlıq xise birmi torğandır. Ğomümän, kiläçäktä ğomer buyı Tatarstanda qalırğa cıyınmıym, dip çemodanda utıruçılar öçen pasport vkladışı da, tatar telen öyränü dä kiräkmi. Ämmä, qaluçılarnıñ, Tatarstanda yäşärgä cıyınuçılarnıñ ruxi tayanıçı bulırlıq mäğlümät taratu oçraqları küzgä taşlanmıy.
XS
SM
MD
LG