Accessibility links

Кайнар хәбәр

Qazanda Başqortostan qunaqları bulıp kitte


Qazanda Başqortostan qunaqları bulıp kitte

Cäy citkäç, Qazanğa qunaqlar bik yış kilä başlıy. Şuşı könnärdä dä başqalabız zur qunaqlarnı qabul itte. Ul da bulsa, kürşe Başqortostan tatarlarınıñ wäkilläre. Alar “Ramazan” mädäniät üzäge oyıştıra torğan Bolğarğa säyäxät qılıp, sişämbe könne Qazanda tuqtaldılar. Bolğarğa oyıştırıla torğan şuşı säyäxät milli tormışıbıznıñ kürkäm ber traditsiäsenä äwerelde. “Azatlıq” radiosı kiçä xäbär itkänçä, 200-läp Başqortostan wäkilläre utırğan “Valeriy Zaytsev” köymäse Qazanğa kilde. Bu yulı Ufa qunaqların tağın da cılıraq qarşı aldılar. Qazan xakimiäteneñ mädäniät idaräse, deputatlar, yazuçılar, sänğätkärlär yılğa portına kildelär. Qunaqlarnı avtobuslarğa utırtıp Qazannı kürsättelär. Alar Ğabdulla Tuqay muzeyında, böyek şağirebezneñ qäbere yanında, Qol Şärif mäçetendä, “Qazan yärminkäse”ndä buldılar. Töşke aştan soñ “Qazan” milli-mädäni üzägendä millättäşlärebez belän oçraşu buldı. Anda ataqlı cırçıbız Färidä Kudaşeva, şuşı säyäxätne oyıştıruçı Marat Şäripov, Qazan şähäreneñ mädäniät idaräse citäkçese Älfiä Tutaeva, yazuçılar Mösäğit Xäbibullin, Rädif Ğataş, Ğälimcan Ğilmanov, cırçılar Miñğol Ğäliev, Liliä Mullağälieva, Mirsäyet Sönğätullin, jurnalist Flürä Nizamova häm başqa küp kenä ädiplär qatnaştı. Kürenekle şağir, Däwlät Şurası räise urınbasarı Robert Miñnullinnıñ da biregä kilüe qunaqlar öçen quanıç buldı. Robert Miñnullinnıñ “Başqortostan tatarları” digän cırı Ural töbägendä yäşäwçe millättäşlärebezneñ gimnına äylängän ikän. Bu xaqta oçraşuğa kilgän qunaqlar söylädelär häm Robert Miñnullinğa bu cır öçen ayırım räxmätlären belderdelär. Bu oçraşu waqıtında tatar häm başqort xalıqların qarşı quyu, bäxäs-fälän bulmadı. Qunaqlarğa Radik Sibğätovnıñ “Başqortostan tatarları” digän yaña kitabı büläk itelsä dä, älege temağa fänni söyläşü bu turistik säyäxät qısalarında ütkärelmäde. Şulay da, älege kitapnıñ mäğrifätçelär öçen nindi qimmätle büläk ikänlege şunda uq kürende. Biregä kiterelgän kitaplarnıñ barlıq nösxäläre tiz arada taralıp bette. Bu säyäxätneñ häm oçraşunıñ töp mäğnäse - bez ber xalıq, tatar xalqınıñ urtaq mädäniäte bar, tamırları bar, dusları küp. Oçraşudan soñ, berdäm yäşibez, üzebez bulıp qalabız, digän xaqiqät küñellärgä señep qaldı. Qazandağı oçraşulardan soñ Başqortostan qunaqları “Zaytsev” teploxodında säyäxätlären däwam itep, Çallığa yul tottılar.
XS
SM
MD
LG