San-Fransiskodağı tatarlarnıñ sanı ikegä arttı

Axırda ber küñelle yañalıq. Bezneñ millät kimi disäñ dä - döres, anıñ artu oçraqları da bar. Penza ölkäse gubernatorı Vasiliy Boçkarev ölkä Sabantuyında küptän tügel bolay dip äytkän ide. Bezdä awıllar qorıy, qart-qorı ğına qalıp bara. Yäşlär ürçemi, ä menä tatar awıllarında tormış görläp tora, matur balalar här ğailädä kürenä. Äyye, Penza tatarları qorığan ağaçqa oşamağan. Şulay uq çit ildäge millättäşlärebez dä qartayırğa, kimergä aşıqmıy. San-Fransiskoda yäşäwçe millättäşebez Cönäyt Çapanoğlı ike yıl elek Qazanda tuy ütkärep, Dilärä isemle möğällimäbezne Amerikağa alıp kitkän ide. Bügen genä ul “Azatlıq” radiosınıñ Qazan byurosına şaltırattı. Xäzer inde Cönäyt häm Dilärä beryulı ike bala üsterälär ikän. İgezäk balalarnıñ berse – qız. Aña Cönäytneñ yaratqan änise – Ömmecihan iseme birelgän. İkençese – malay. Nuri isemle. Cönäyt Çapanoglı – injener, milli eşlärdä igelekle ğämälläre belän mäğlüm. Qazandağı dusları anı häm ikençe gimnaziäneñ elekke uqıtuçısı Diläräne qotlıylar. “Azatlıq” radiosı öçen Qazannan Rimzil Wäli.