Abiturientlar öçen awır waqıtlar artta qalsa, awıl xucalığı öçen qızu uraq öste äle başlanıp qına kilä. Tatarstanda urıp-cıyuğa kereştelär. Qazannıñ Efir telekompaniäseneñ xäbärlär programması bu xaqta, respublikanıñ iñ yaratqan küñel açu çarası waqıtı citte, dip äytte. Xäbärlärdä här könne tege yäki bu rayondağı berençe ikmäkne tapşıru tantanaların kürsätep toralar. Xäyer, kemgä küñel açu, ä kemgä bik awır häm cawaplı eş. Şuşındıy qorı häm esse könnärdä bıyılğı uñışnı urnaştırıp qalırğa da ölgerergä kiräk bit. Respublikanıñ awıl xucalığı ministrı Marat Äxmätov süzlärenä qarağanda, bıyılğı uñış ta bıltırğıdan qalışmasqa oxşağın. Şunısın da äytergä kiräk, däwlät ambarlarında äle bıltırdan qalğan ikmäk tä saqlana ikän. Dimäk, kiläse yıllarda ikmäk alay uñmasa da, Tatarstannıñ açtan ülmäslek zapası bar. Bu xaqta ministr üzeneñ çärşämbe könne Tatarstan radiosında yasağan çığışında äytep kitte. Şulay uq ul anda awıl xucalığı xezmätkärläreneñ küp sanlı soraularına da cawap birde. Şuşı söyläşüdän alınğan tağın ber qızıqlı mäğlümät. Awıl xucalığı akademiäsen häm veterinariä institutın tämämlawçı belgeçlärneñ 7 protsentı ğına eşkä awılğa qayta. Qalğanı awıl xucalığın şähärdä genä üsterüne qulay kürä. Xäyer, Tatarstannıñ citäkçelegendä dä şuşı yuğarı uqu yortların tämämlawçılar küpçelekne täşkil itkänne iskä alsañ, bu san ber dä säyer kürenmi.
«Azatlıq» radiosı öçen Tatarstan xäbärläre belän Qazannan Gölnaz İlgizär
«Azatlıq» radiosı öçen Tatarstan xäbärläre belän Qazannan Gölnaz İlgizär