Accessibility links

Mäskäw faciğäsenä häm matäm könenä reaksiä


Mäskäw faciğäsenä häm matäm könenä reaksiä

Bu kön dä uzar, äytkän di tormışınıñ bik ğazaplı köne turında ber keşe. Şulay itep, Mäskäw faciğası da, düşämbe matäm köne dä uzıp kitte. Xäbär itkänebezçä, Qazanda matäm könendä däwlät, xökümät binalarındağı Rusiä häm Tatarstan bayraqları tübän töşerelde. Çirkäwlärdä häm mäçetlärdä älege faciğalärdä häläk buluçılarnıñ ruxına bağışlap doğa qılındı. Totıqlar arasında 3 Qazan keşese bar, dielä. Alar äle Mäskäwdä xastaxanälärdä, nindi xäldä ikännäre mäğlüm tügel. İnde xäbär itkänebezçä, Mäskäwdäge faciğa barışında Tatarstan telekanalı aşığıç maxsus tapşıru çığardı. Bu tapşıru “Efir” telekompaniäseneñ, äytkändäy, cenenä yaramadı häm älege tapşıruğa qarata yakşämbe könne, eşlär uzğaç, botqalar suınğaç, kontr-tapşıru çığardı. Läkin monısın da Qazan xalqı tınıç uzdırdı. Älbättä, äle Mäskäw faciğasen analizlau, aña säyäsi bäya birü – bolar barısı da alda. Menä Tatar-inform agentlığı “Либеральная Россия” firqaseneñ Tatarstan bülege räise Mars Şämsetdinov Mäskäwdän ber mönäsäbät belderüne işetep qaytqan. “Либеральная Россия” säyäsi şurası üzeneñ rezolyutsiäsendä “Mäskäwdä totıqlar alu waxşilärçä cinayät, ämma çeçen separatizmı, terrorizmı – ul Çeçenyada federal' xaqimiät terrorizmına cawap”, dielgän. Älege rezolyutsiädä Rusiä citäkçelegenä berniçä taläp quyılğan. Ayırım alğanda, Çeçnyadağı suğışnı kiçektermiçä tuqtatırğa häm barlıq qızıqsınuçı yaqlar belän dä söyläşülär başlap cibärergä. “Либеральная Россия” firqase rezolyutsiäsendä çeçen problemasınıñ çişeleşeneñ berdän-ber yulı – ul tınıç säyäsi cayğa salu yulı. Mondıy belderülär, rezolyutsiälär äle küp bulır. Rusiäneñ säyäsi qırındağı bu ğadäti xällär. İnde Rusiäneñ ber bilgele säyäsi küzätüçese “Bu faciğädän soñ Rusiädä närsä bulır inde?” dip quyılğan ayanıç sorawlarğa “Närsä bulsın, barası da üz yulına, üz suqmağına äylänep qaytır”, dip cawap birde dä.
XS
SM
MD
LG