Däwlät Şurasınıñ Fän, mäğärif, mädäniät häm milli mäs'älälär komissiäse 2003 yılğa büdjetnı tikşerä

Ä inde mädäniät, mäğärif turında söylägändä, pänceşämbe könne Tatarstan Däwlät Şurasında anıñ yazmışı turında süz bardı. Bu könnärdä Däwlät Şurasınıñ daimi komissiälärendä 2003 yılğa respublika büdjetı proyektı tikşerelä. Daimi komissiä utırışları awır bara, bäxäslär quba. Çönki 2003 yılğa büdjet defitsitlı. Ministrlar Kabinetı farazınça, bu defitsit 9,7%-qa citärgä mömkin. Bu bıyılğı büdjet defitsitınnan 1 milliard sumğa artığraq. Şuña kürä daimi komissiälärlä här san, här protsent öçen köräş bara. Ä menä mädäniätkä häm sänğätkä 2003 yıl büdjetında näq 1 milliard sum aqça qaralğan. Fän, mäğärif, mädäniät häm milli mäs'älälär komissiäseneñ pänceşämbe utırışına berençe mäs'älä itep Tatarstan Respublikasınıñ 2003 yılğa büdjetı xaqındağı mäs'älä quyılğan. Şulay uq mäğärif turındağı häm fän häm däwläti fän, texnika säyäsäte turındağı federal' qanunnarğa üzgäreşlär kertü mäs’äläläre da bar. Sezgä bu xäbärne äzerlägändä äle utırış näticäläre mäğlüm tügel ide. Täfsilleräk itep - kiläse tapşırularıbızda.