Accessibility links

Кайнар хәбәр

İran belän Tatarstan arasında xezmättäşlek turında memorandum imzalandı


Äyterseñ lä, bıyıl kürep qalıyq dip, Qazanğa ber-ber artlı aşığa-aşığa däräcäle qunaqlar kilep tora. Boris Yeltsin, Törkiäneñ Rusiädäge ğädättäntış häm tulı waqälätle ilçese Kurultuş Taşkent, İran İslam Respublikası delegatsiäse. Yıraq çit illärdän kilgän qunaqlarnıñ maqsatı bilgele açıq bulsa da, Rusiäneñ elekkege prezidentı Boris Yeltsinnıñ Qazanğa 5-6 köngä kilüe küplärgä añlaşılıp betmäde. Ber-işelär Tatarstan prezidentı Mintimer Şäymiev Boris Yel'sinnıñ respublika öçen elekkege qılğan igelekle ğamällären istä totıp çaqırğan dilär. Qayberäwlär mondıy sallı tuy generalnı “Piramida” kebek tarixi üzäkne açu mäclesenä turı kiterep çaqırğannar dip isäplilär. Bälkem, Boris Yeltsinbezgä cillänep qaytu teläge belän kilgänder. Elekkege patşanıñ Rusiä prezidentı Vladimir Putinğa yaqın keşe ikänen istä totıp bulsa kiräk, Mintimer Şäymiev anı här cirdä üze citäkläp yörde.

Soñğı yıllarda İrannıñ Qazanğa tartıluı konkret urtaq ğamällärgä kiterde. İnde xäbär itkänebezçä, pänceşämbedä Tatarstan Ministrlar Kabinetında İrannıñ mädäniät häm islam yunälşe ministrınıñ berençe urınbasarı Mäxmüt Araki häm respublkanıñ xökümät citäkçese urınbasarı Zilä Wälieva xezmättäşlek turındağı memorandumnı imzaladılar. İranda xatın-qızlarnıñ xicapsız, yäğni çäçne-bitne qaplamıyça irlär aldına çıqmağanın belgängä Zilä xanımnıñ islam ministrı urınbasarı aldında yevropalılarça päydä buluın qunaqnı qawşatır dip kötelsä dä, Mäxmüt Araki, kiresençä, İranda soñğı yıllarda xatın-qızlarnıñ mäcles häm xökümät eşendä aktiv qatnaşuın iskä töşerde. Ä premyer-ministr Röstäm äfändeneñ isemen İran qunağı bahadir suğışçı dip tärcemä itkäç, söyläşü bülmäsendäge dustanä atmosfera tağın da yomşardı, buğay. Ğoref-ğadätlär, mädäniät arasındağı ayırmalıqlar kiläçäktä tağın da yaxşıraq añlaşılır häm alar yäqınayır da äle. Çönki kileşülär nigezendä kiläçäktä studentlar, uqıtuçılar, sänğat'kärlär belän almaşu küzallana. İran yağı üzendä Tatarstan könnären uzdırunı täqdim itte. “Ata-babalarıbız çorında bulğan tığız elemtälärne torğızu – ikeyaqlı xezmättäşlekne tağın da nığıtır”, dide Mäxmüt Araki. Comğa könne İran delegatsiäsen Tatarstan prezidentı Mintimer Şäymiev qabul itte.
XS
SM
MD
LG