Äfğänstan prezidentı Xämit Karzai kiçä boralaq qazasında hälak bulğan 7 alman xärbien, Äfğänstan Paqstan çigendä atıp üterelgän Amerikan soldatın häm bügen Kandaharda üterelgän 2 Äfğän soldatın iskä alıp oçraşunı 1 minut tınlıq belän başlap cibärde. Äfğänstannıñ kürşeläre qabat berqayçan da Äfğänstannıñ eçke eşlärenä tıqşınmasqa dip wäğdä birdelär. Deklaratsiäne , İran, Üzbäkstan, Taciqstan, Törkmänstan, Paqstan häm Qıtay tışqı eşlär ministrları yäki ilçeläre imzaladı. BMO-nıñ Äfğänstandağı wäkile Lahdar Brahimi bu deklaratsiä Äfğänstannıñ üz kürşeläre belän mönäsäbätlärendä yaña säxifäne açıp cibärä dide. Brahimi oçraşu äğzalarına BMO General’ Sekretare Kofi Annannıñ bu kileşüne tarixi dokument dip bäyälägän belderüen uqıp birde.
