Ministrlar Kabinetınıñ çirattağı brifingı awıl xucalığına, respublikanıñ yazğı qır eşlärenä äzerlegenä bağışlandı. Yazğı qır eşläre bıyıl az digändä, ber ayğa soñarıp kilä. Yaznıñ bolay soñaruı monnan 12 yıl elek, 1991 yılda küzätelgän. Yaznıñ soñaruı qır eşlären tığızlıy, texnika äzerlege, yağulıq, orlıq belän tä'min itü problemaları kiskenläşä. Brifingta qatnaşuçı awıl xucalığı ministrlığı citäkçeläre orlıq, yağulıq mäsäläse xäl itelgän, didelär. Texnikağa kilgändä, ul iskergän, yaña texnika alu qibatlı mäşäqätlär. Şulay da, awıl xucalığınıñ texnik xezmäte dä texnikanıñ, ğädättägeçä, 80-90% äzerlegen tä'min itärlek xäldä. Awıl xucalığın kreditlatu tärtibe häm däräcäse uzğan yıldağıça saqlana. Şulay qır eşläre uzğan yıllardağıça äzerlek häm tä'min itü däwlät yärdäme belän başlanıp kitsä dä, anıñ artqa tägäräwe, bölgenlekkä çığuı tuqtatıldı, dip äytep bulmıy. Böten Rusiädäge kebek ük, eşkärtelmiçä, çäçmiçä, buş qala torğan mäydannar probleması bar. Tatarstanda bıyıl bölgenlek aldında toruçı 1100 kümäk xucalıq bar. Bolar bigräk tä Älki, Ägerce rayonnarında küp ikän. Mondıy Rusiä küläm problemasın xäl itüdä awıl xucalığı ministrlığı citäkçeläre cir reformaların realizatsiäli başlawda kürälär. Bıyıl “Tatarstanda cir äyläneşe turında”ğı zakon qullanışqa kerä. İnde unışar meñ gektar cirgä xuca bulırğa teläk beldergän ike ere investor bar. Alarnıñ berse – “Qızıl Şärıq” aksionerlıq cämğiäte, ikençese – “Xuzanğay” digän firma. Läkin şundıy bay awıl xucalığına millionlağan dollar investitsiälär kertüçelär bulamı-yuqmı, Tatarstanda ber gektar cir dä buş, çäçmiçä qaldırılmayaçaq. Çäçä-ura almıy torğan xucalıqlar cirläre köçle, xälle xucalıqlarğa bülenep bireläçäk.
