Accessibility links

Кайнар хәбәр

Tatarstanda Rusiä yäşläre köne bilgeläp ütelde...


27 yün – yäşlär köne. Elekke yıllarda ul Sovet yäşläre bäyräme dip yörtelsä, xäzer Rusiä yäşläre köne. Bıyıl ul 10nçe tapqır bilgeläp ütelä. Bügenge köndä yäş keşe bulu awırmı, ciñelme? Äydägez bergäläp uylanıp qarıyq.

Respublikada terkälgän 27 meñ eşsezneñ 30% - yäşlär. Yuğarı belem alğan yegetlär-qızlar da yış qına eşkä urnaşa almıy. Yuğarı uqu yortlarına kerü, şulay uq, qıyınlaşa bara. Student bulğan oçraqta da yäşäw räxätme? Xäzerge yäşlärneñ äti-äniläre genä, bişlelärgä genä uqıp, zur stipendiä aluları turında sağınıp söyli ala. Bügen studentlar ayına 200 sum alıp yäşi. Anı, bik tırışqanda, 2 tapqır aşarğa citkezep bula.

Stipendiäneñ kütärelüe turında xäbär çıqqaç, studentlar bik söyengän ide. Läkin alarnıñ söyeneçläre ozaqqa barmadı. Yuğarı belem birü qanuına kertelgän üzgäreşlär näticäsendä, 2003 yılnıñ sentäberennän stipendiä 200 sumnan 400-gä qädär artaçaq. Bu aqçağa da yäşäp bulmıy. Qayber yuğarı uqu yortlarında, bik sälätle studentlarğa, däwlätneñ, ayırım säyäsätçelärneñ häm oligarxlarnıñ isemle stipendiäläre birelä. Anıñ öçen yegetlär-qızlar qatlawlı sınawlar ütep, üze kebek sälätle yäşlär belän yarışta ciñep çığarğa tieş bula. Köräşep alğan stipendiä dä 1000 -1500 sumnan artmıy. Şulay itep, yäşlärgä uqudan soñ eşkä yögerergä, yäki äti-äni yärdämenä ömet itärgä turı kilä.

Elekke zamanda komsomol, pionerlar oyışması bar ide, xäzer yäşlärne berläşterüçe köç yuq, dilär. Läkin, räsmi terkälgän isemleklärgä qarasaq, anda distälägän yäşlär oyışmasın küräçäkbez. Alar arasında tulay toraqlarda tärtip saqlawçılar da, äylänä tirä möhitne qayğırtuçılar da, xoquq yaqlawçılar da, möselman dinen totuçılar da bar. Soñğı waqıtlarda säyäsi qaraşlı yäşlär oyışmaları barlıqqa kilä başladı. Milli xäräkättä dä, kommunistlarda da, uñnarda da, xakimiät partiälärendä dä üz yäşlär oyışmaları bar. Saylawlar yılında, bik citez häm ayıq fiker yörtüçe bu sotsial qatlam wäkillärenä dä iğtibar zur. Mäktäp tämamlawçılarnıñ bäyrämnären dä bıyıl ayıruça zurlap ütkärdelär, säyäsätçelär dä stipendiälär tarattılar. Mäsälän Duma deputatı Oleg Morozov, küptän tügel Qazan universitetında säyäsät fänen öyränüçe ber niçä taläpkä şundıy büläk yasadı.

27 yündä isä «Tatarstan yaña ğasır» xäräkäte citäkçese häm Däwlät Şurası räise Färit Möxämmätşin yäşlär oyışmaları wäkilläre belän oçraştı. Älege oçraşuda, parlamentta yäşlärdän torğan ictimaği palata oyıştıru mäs’äläse tikşerelde. Bu xaqta söyläşülär inde küptän barsa da, alarnıñ tormışqa aşqanı yuq ide. İnde xäzer yaqındağı plenar utırışta, Däwlät şurasınıñ daimi komissiäse qarşında şundıy ictimaği palatanı buldıru mäs’äläse qaralaçaq. Anda kergän keşelär, Däwlät Şurasında qaralğan qanunnarğa yäşlär közlegennän qarap bäyä birä alaçaq. Parlament tormışın öyränä toru da alarğa zıyan itmäs, dip sanıy oyıştıruçılar.

Xakimiätlär dä bäyrämnän çittä qalmıy. Qazansu yarında irtädän kiçkä qädär, bäyräm çaraları ütkärelde. Anda sport yarışları disezme, su häm ğadi mototsikllarda yarışu disezme, hawa şarına utırıp yörü, cilkänle köymälär yarışın qaraw, bäyräm konsertın tıñlaw da qaralağan. Bu kön belän sport häm yäşlär eşläre ministrı Marat Bariev da qotladı.Ul anda yäşlärne sport belän şöğellänergä, sälämät yäşäw räweşen modağa kertergä öndi.

Bikä Timerova, Qazan.
XS
SM
MD
LG