AQŞ saqlanu ministrı Donald Rumsfeld Ğiraqta amerikan häm britan xärbilärenä höcümnär bu könnärdä tağın da artırğa mömkin dip kisätte. Anıñ süzlärenä qarağanda bu xäl, şuşı atnağa turı kilgän, Säddäm Xösäyen rejimı waqıtındağı bäyrämnär belän bäyle. Bügen Bağdadta amerikan ğäskärläre tağın höcümgä duçar bulğan. Ber xärbi üterelgän, altısı yaralanğan. İkençe ber bäreleştä tağın ber soldat yaralanular alğan. Kiçä bilgele bulmağan ber törkem Ğiraqtağı koalitsiä ğäskärlärenä höcümnär öçen cawaplılıqnı üz östenä aldı. Bu törkem üzen "Äl Qäidä" belän bäyle dip, törle höcümnär häm şartlatular artında Säddäm Xösäyen tarafdarları tügel, şul törkem suğışçıları tora dip raslıy.
Bağdadta inde ikençe kön Ğiraqnıñ xakimiät şurası cıyılışı bara. Bügen citäkçe saylaw häm başqa mäs'älälär qarala. Başqarma xäkimiätneñ waqıtlı organına barlıq etnik, dini häm säyäsi törkemnärneñ wäkilläre kergän.
