14nçe yündä Tatarstan gimnın Däwlät Şurasında raslawğa un yıl tuldı. Kompozitor Röstäm Yäxin icat itkän bu köygä yazılğan cır şul waqıtta uq populyarläşkän ide inde. Şuña kürä anı cämäğätçelek üz itep qabul itte. Un yıl däwamında ul, äytik, Rusiä gimnı kebek üzgärmäde. Şulayda Rusiädä xakimiät vertikalen nığıta başlağaç, yañadan elekkege Sovetlar Soyuzı gimnına äylänep qaytqaç, Tatarstan radiosı häm televideniese tapşıruları aldınnan Rusiä gimnın başta, annan soñ Tatarstan gimnın yañğırata başladılar. Şulay Tatarstan töbäklär belän federal' üzäk arasın caylawğa bağışlanğan forumnar, xalıq-ara konferensiälär ütkärä. Bu başlanğıçlar, bu omtılışlar üzäktä qabul da itelä, xuplana da kebek. Ä ğämäldä äkrenläp nığıtu qısu säyäsäte alıp barıla. Uzğan atna azağında Tatarstanda därtlänep Rusiäneñ federativ statusına bağışlanğan Auropa konferensiäsen ütkärep yörgän könnärdä Rusiä Federatsiäse Yuğarı Sudı Tatarstan Däwlät Şurasın “ taratıp” quyğan bulıp çıqtı. 11 yüldä Rusiä Yuğarı Mäxkämäseneñ grajdanlıq eşläre kollegiäse respublika Üzäk saylaw komissiäseneñ monnan dürt yıl elek “49 xalıq deputatınıñ saylanğannar”- dip tanuı turındağı qararın ğämäldän çığarğan. Döres Däwlät Şurasınıñ moña ällä ni ise kitmäde. Rusiä Yuğarı Mäxkämäse Tatarstan Däwlät Şurasın küptän “tarata” inde. Monnan ike yıl yarım “Равноправие и законность” ictimaği-säyäsi xäräkät wäkilläre 49 xalıq deputatınıñ saylanuı qanuni tügel digän şiqäyäte mäxkämälär arasında qağılıp- suğılıp yöri. 2002 yılnıñ 22 ğinwarında Rusiä Konstitutsiä mäxkämäse bu tartqalaşnı tuqtatqan ide inde. Tatarstannıñ saylaw qanunnarı yaña federal' qanunnarğa turı kilmi, ämma Däwlät Şurasına saylanğan deputatlar wäkälätläre tämamlanğança eşläyäçäk digän qarar çığarğan ide inde. Menä şuşı kommentariynı Däwlät Şurası Räise Färit Möxämmätşin sişämbe çıqqan köndälek matbuğat çaralarında qabatlarğa mäcbür. Şuşı aqlanu xisläre xättä Almaniäneñ Rusiädäge Ğädättän tış häm Tulı wäkälätle ilçese Xans-Fridrix Pletsnı qabul itkändä dä sizelä. Färit Möxämmätşin Däwlät Şurası eşçänlege turında söylägändä: “Federal' üzäk belän bulğan mönäsäbätlär kiskenläşüe xäzer çişeleş taba. 90 yıllar başında bez äytkän närsä- wäkälätlär büleşüdä tögällek kiräklege- yaña federal' qanunnarda tormışqa aşırıla başladı dielä” räsmi xäbärdä. Almaniä ilçese üz çiratında federal' üzäk belän mönäsäbätlärdä Tatarstannıñ üz pozitsiälären nıq yaqlawı simpatiä tudıra digän xuplaw süzläre äytkän. Sişämbe könne Almaniä ilçesen Mintimer Şäymiev qabul itte. Süz säwdä-iqtisadıy bağlanışlarnı üsterü turında bardı.
