Ütkän yal könnärendä, Kurkaçi hawa alanında aviatsiä bäyräme häm Tatarstan aeroklubnıñ 70yıllığı bilgeläp ütelde. Könneñ bolıtlı häm ciläs buluı da oçqıçlarnı yaratuçılarğa qomaçaw itmäde. Bäyrämdä paraşyut belän sikerüçelär häm pilotlar ostalıqların kürsätte. Mäsälän İl-103, L-29 oçqıçları häm Mi-2 boralağı hawada törle figuralar yasadı. Teläweçlärneñ, oçqıçqa utırıp yörergä häm paraşyut belän sikerergä dä mömkinlege buldı. Bäyrämdä aviakompaniä citäkçeläre, transport häm sport ministrlıqları citäkçeläre dä qatnaştı, dip xäbär itte «Azatlıq» radiosına aeroklub citäkçese.
Ğomum alğanda, aviatsiä tarmağında eşläwçelärneñ käyefläre bäyrämçä tügel. Ölkägä aqça citmäwe, texniknıñ iskerüe, häm eş xaqlarınıñ tübänlege – menä töp qıyınlıqlarınıñ berniçäse. Äle küptän tügel genä aviatsiä tarmağında eşläwçelär böten rusiä buylap eş taşlaw çarasın ütkärergä cienğan ide.«Tatarstan» aviakompaniäse citäkçese urınbasarı Vladimir Nikraşeviçnıñ äytüençä, elegräk awır zamanalar bulsa da, xäzer şirkät tabış kiterä başlağan. Berençe yartı yıllıqqa alar inde 17 mln. sum açqa eşlägän. Eş xaqı häm salımnar waqıtında tülänä. «Tatarstan» hawa şirkätendä Tu-134, Tu-154, Yak-42, An-24 törlärendäge oçqıçlar qullanıla. Kiläse yılğa «Tatarstan» hawa şirkäte maşinalar parkın yañartırğa teli. Mäsälän Tu-154B urınına, xalıqara taläplärgä cawap birä torğan Tu-154M digän oçqıçına satıp alu planlaştırıla. Şulay uq, bu şirkät Tatarstanda eşlängän Tu-214 oçqıçın da üzlärendä buldırırğa teli. Älegä oçqıçnı arendağa birü turında söyläşülär bara ikän.
Ä Tatarstanıñ ğorurlığı dip sanalğan - «Tu-214» oçqıçı 19nçı avgustta açıla torğan, «MAX-2003» digän xalıqara aviakosmik salonda da bulaçaq. Bu çara älege oçqıçlar kürsätkän figuralar belän açılıp kitärgä tieş. Şulay uq Qazanda eşlängän zur «Mi-17» häm ike ciñel «Aqtay» belän «Ansat» boralaqları da dönya belgeçläre aldında oçıp kürsätäçäk.Bikä Timerova.
