İnde xäbär itep kilüebezçä, Däwlät Şurası aşığıç räweştä parlament saylawlarına qağılışlı qanunnarğa üzgäreşlär häm östämälär kertä. 17nçe sintäberdä közge sessiäneñ şuşı problemağa bağışlanğan öçençe utırışı uzdı. “Däwlät Şurası xalıq deputatların saylawlar turında”ğı qanun proyektı öçençe uqılışta, “Däwlät Şurası deputatların saylawlarnı Rusiä prezidentı saylawları belän berläşterü turında”ğı häm “Professional' daimi nigezdä eşläwçe Däwlät Şurası deputatları sanı turında”ğı qanun proyektları ikençe uqılışta qabul itelde. 79nçı okrug deputatı Aleksandr Ştanin Däwlät Şurası belän berençe batırğa qalu öçen “köräşkä” çıqtı. Kön tärtiben täğäyenlägändä, ul “Däwlät Şurasınıñ üzen-üze taratuı häm dekabergä saylawlar bilgeläw turında” mäs'älä täqdim itte. Çönki, anıñ äytüençä, sişämbe könne Rusiä Yuğarı mäxkämäse kollegiäse 49 deputatnıñ terkälüen ğämäldän çığaruçı yül qararın ütärgä ike atna waqıt bilgelägän. Bu “ütergeç” argumentqa deputat Oskolok “документы на стол”, yäğni qararnı östälgä çığar digän cawap belän yaptı. Läkin deputat Ştanin monıñ belän genä tuqtamadı. Kiläçäk saylawlarnı Rusiä prezidentı saylawları belän berläşterü turındağı qanun proyektın ikençe uqılışta tikşerügä kereşkäç ul tağın ber tapqır uzğan utırışlarda beldergän töp argumentın qabatladı. Yäğni, süz Däwlät Şurasınıñ wäqälätlären möddätennän alda tuqtatu turında bara. Häm bu däwlät citäkçeläre mänfäğätlärendä eşlänä. Alar şul älege dä bayağı mäxkämä qararların mäcbüri ütäp, Däwlät Şurasın taratu nizağınnan qotılıp qalırğa telilär. Bu deputat Aleksandr Ştanin fikere. Qanun proyektlarına tözätmälärne tikşergändä, Färit Möxämmätşin räis xoquqınnan faydalanıp süz uñayınnan ğına parlament citäkçelegeneñ häm küpçelek deputatlarnıñ argumentın äytte. Anıñ fikerençä, deputat Ştaninnıñ mondıy omtılışları Däwlät Şurasınıñ eşçänlegen paraliçlawğa häm Rusiä Däwlät Dumasına häm Rusiä prezidentı saylawları çorında säyäsi körçekkä kertügä yünälderelgän. Şunıñ belän bu qarışu tuqtaldı, deputatlar tänäfessez eşläp köndezge 12gä kön tärtibendäge barlıq mäs’älälärne dä xäl itep utırışnı tämamladılar.
Yunıs Ätnäle
