Accessibility links

Кайнар хәбәр

Tatarstan keşe xoquqları yaqlawçıları BDB illäre belän xezmättäşlekne kiñäytergä omtıla


Tatarstan Respublikasınıñ Keşe Xoquqları Komissarı 3 yıl elek kenä barlıqqa kilgän bulsa da, anıñ täcribäse Rusiä töbäklärendäge häm xättä çit ildäge keşe xoquqların saqlaw belän şöğıllänüçe oyışmalarnıñ iğtibarın cälep itä, xörmätle tıñlawçılar. Mäsälän, Sişämbe könne Azerbäycannıñ Keşe Xoquqları buyınça wäkileneñ yärdämçeläre Niğar Zeynalova häm Lala Azimova Qazandağı kollegalarınıñ eşläw ısulların öyränep kittelär.

Bu vizit alar öçen bik möhim, çönki Äzerbäycanda Keşe Xoquqları buyınça wäkileneñ wazifası ber yıl elek kenä buldırılğan häm älegä wäkil apparatınıñ eşen cayğa salu haman däwam itä. Üzläreneñ säfäre barışında Azerbäycan qunaqları Tatarstanda keşe xoquqları niçek yaqlana, islam dinen totuçılar, xatın-qızlar, törmälärdä totıluçılar nindi şartlarda yäşägänen dä tikşergännär.

Äzerbäcän Keşe xoquqları buyınça wäkileneñ yärdämçeläre Niğar häm Lala tutaşlar süzlärençä, alarnıñ tuğan respublikalarında da, Tatarstanda da keşe xoquqların yaqlawçılar oçratqan qıyınlıqlar bertörle diärlek – naçar sotsial' wäzğiät, awır yäşäw şartları häm xalıqnıñ üz xoquqları turında belmäw. Şuña kürä dä, keşe xoquqların yaqlawçılar üzara xezmättäşlekne, belem häm täcribä belän almaşunı bik uñay dip tabalar. Mäsälän, Tatarstanda, Keşe Xoquqları buyınça wäkil Räşit Väğizovnıñ, anıñ apparatında äzerlägän qanun proyektların, Däwlät Sovetında täqdim itü xoquqı bar. Äzerbäycan qunaqların bu mömkinlek bik qızıqsındırdı. Äzerbäycanda Keşe Xoquqları buyınça wäkileneñ apparatı Tatarstanğa qarağanda berniçä tapqır zurraq. Bu oyışma äle yäş buluğa da karamastan, anda grajdannardan möräcäğätlär qabul itü öçen üzençälekle häm bik uñışlı protseduralar qaralğan.

Tatarstannıñ Keşe Xoquqları buyınça wäkile Räşit Väğizov süzlärençä, ul Äzerbäycanda şundıy uq wazifalarnı başqaruçı Elmira Söläymanova belän küptän tügel tözelgän şartnämä nigezendä, başqa BDB illäre belän dä xoquqlarnı yaqlawda xezmättäşlek turında şartnämälär imzalarğa cıyına.

Bu şartnämälär nigezendä, Tatarstanda yäşägän BDB illäre grajdannarı üzläreneñ tuğan illärennän, ä BDB illärendä yäşägän Tatarlar Tatarstannan xoquqi yärdäm ala alaçaq.

Şunısın da äytergä kiräk, Tatarstan häm Äzerbäycannıñ keşe xoquqları buyınça wäkilläre tözegän şartnamädä Rusiä Çit İl Eşläre Ministrlığı bik teläsä dä qatnaşmadı. Bu dokumentnı äzerlägändä, Ministrlıq, nişläp bezdän röxsät almıyça, çit il belän kileşü tözisez, dip qarşılıq beldergän ide, läkin soñraq alar üz möräcäğäten kire aldılar. Çönki Rusiä konstitutsiäsendä häm däwlät iminlege konsepsiäsendä yazılğança, keşe xoquqları däwlät öçen iñ zur qimmät häm Rusiä çit illärdä yäşägän üz watandaşlarınıñ xoquqların yaqlarğa tieş. Citmäsä, bu süzlär Ğomum Keşe Xoquqları Deklaratsiäsendä dä yazılğan. Tatarstan Konstitutsiäse buyınça da, respublika üzeneñ böten dönyağa sibelgän watandaşlarına alarnıñ mädäni häm başqa ixtiacların qänäğätländerüdä bulışa. Dimäk, respublikanıñ Rusiä töbäklärendä, çit illärdä yäşäwçe tatarlarğa xoquqi yärdäm kürsätüe, xalıqara, Rusiä häm Tatarstan qanunnarına qarşı kilmi.

Azatlıq Radiosı öçen Qazannan İskänder Nurmi.
XS
SM
MD
LG