“Tatar cırı-2003” festivalendä Alsu qatnaşırmı?

Uzğan yılnıñ soñğı könendä Tatarstan prezidentı Mintimer Şäymiev milli tormışqa bäyle ber qarar çığardı. Xäzer Sçapov uramındağı Akterlar yortı ataqlı rejisser Marsel Sälimcanov isemen yörtäçäk. Räsmi yañğıraşnı berençe tapqır sezgä işetteräbez – Marsel Sälimcanov isemendäge Akterlar yortı.

Mintimer Şäymievnıñ Başqortstan prezidentı Mortaza Räximovnıñ inauguratsiäsendä yasağan çığışı kiñ cämäğätçelek öçen ser bulıp qaldı. Ayırım alğanda tatar tele, milli respublikalarnıñ älifbağa xoquqı turındağı fikerlär Başqortstan televideniese tarafınnan qısqartıp birelgän ide. Tatar xalqına bäyle fikerlärgä senzura yasaw Ufadağı kollegalarıbız öçen ğädäti xälgä äylänep bara. Düşämbe könne Mintimer Şäymievnıñ Ufadağı çığışı tatarstan prezidentınıñ mäğlümat üzäge tarafınnan redaksiälärgä taratıldı. Anıñ belän İntertat.ru elektron gazetası bitlärendä tanışırğa mömkin bulaçaq.

9, 10, 11nçe ğinwarda Piramida tamaşa kompleksında “Tatar cırı-2003” televizion festivale ütäçäk. Bu bäygegä iğtibar bik zur. Biletlar şaqtıy qimmät buluğa da qaramastan, barlığı ike meñ yarım urın küp millionlıq tatar xalqı öçen az dip sanala. Qazan cırçılarınnan başqa festival'gä Avstraliädän Zölfiä Kamalova, Finlyandiädän İsmal, Mäskäwdän Rinat İbrahimov, Ufadan İdris Ğäziev, Fädis Ğäniev Piramida säxnäsendä çığış yasayaçaqlar. Xalıqara yoldız Alsu Safinanıñ kilü mömkinlege äle dä kön tärtibennän töşep qalmağan. Bäxäslär dä bulır, säxnägä häm Piramida zalına kerergä teläp tä, anda elägä almawçılar da az bulmas. Ämma, bu çınnan da zur häm qızıqlı tamaşa bulırğa oxşağan.

Rimzil Wäli