Şulay itep, 6 yıllıq tänäfestän soñ Tatarstanda Rusiä däwlät telekanalınıñ “Вести” korrespondent byurosı yañadan eşli başladı. ”Вести”nıñ korrespondent çeltäre xezmäte başlığı Eduard Bondarenko byuro eşe başlanuın räsmi räweştä iğlan itkändä bu tänäfesne citeşmäwçelek belän añlattı. Ä xäzer waqıt citkän – alda Qazannıñ 1000-yıllığı. Eduard Bondarenko byuro citäkçese itep Rafael' Daminovnı täqdim itte. Häm aña, anıñ ike xezmättäşenä tanıqlıq tapşırdı. 30 yäşlek Rafael' Daminov moñarçı Tatarstan däwlät telekanalında xäbärçe bulıp eşlägän, xalıqara mönäsäbätlär institutın tämamlağan, ğäräp telen belä. “Вести”nıñ Tatarstan byurosı Tatarstan däwlät tele-radiokompaniäse binasında urnaşqan häm ul eşendä dä däwlät telekompaniäsenä tayanaçaq. Bu monnan 6 yıl elek tä şulayraq ide, läkin xäzer bu qanuni nigezdä. Çönki Eduard Bondarenko äytüençä, Rusiä däwlät tele-radiokompaniäse häm Tatarstan tele-radiokompaniäse ber xoldingta häm bu fakt. “Вести” byurosı açılu çarasın töp oyıştıruçılarnıñ berse Tatarstan däwlät tele-radiokompaniäse räise Ayrat Sibagatullin xoldingğa kerü faktı häm üzara mönäsäbätlär turında “Azatlıq” radiosı tıñlawçıları öçen menä närsälär äytte.
AUDİO. Xoquqi yaqtan Tatarstan däwlät tele-radiokompaniäseneñ Rusiä däwlät radio häm televidenie xoldingına kerüe xäl itelsä dä, äle finanslaw mäs'äläse xäl itelmägän. Älegä “Вести” byurosı xezmätkärläre berençelärdän bulıp, xezmät xaqın turıdan-turı Mäskäwdän aluçı xezmätkärlär bula. Yunıs Ätnäle
