Bügen İran parlamentındağı qädimçe äğzalar xökümätne uran bayıtu eşen yañartırğa häm atom qorılmalarında kötelmägän BMO tikşerülären tuqtatırğa mäcbür itüçe qanun ölgese täqdim itte.
Räsmi İRNA xäbär agentlığı belderüençä, İran parlamentında küpçelekne täşkil itüçe qädimçelär bu ölgene qarawnı tizlätergä teli. Näticädä bu qanun aldağı berniçä kön eçendä qaralırğa mömkin.
Bu qanunnıñ qabul itelüe İrannı BMO atom energiäse idaräse belän qarşılıqqa quyaçaq. İdarä İrannan Noyäber axırına qädär uran bayıtu eşlären tulısınça tuqtatunı taläp itep, tuqtatılmağan oçraqta İrannıñ atom eşçänle mäs'äläsen BMO İminlek Şurası qaramağına tapşıru belän yanadı.
Bıltır İran uran bayıtu eşen tuqtatıp torırğa häm İdarä wäkillärenä kötelmägändä kilep İrannıñ atom qorılmaların tikşerü mömkinlege birergä rizalaştı.
AQŞ İrannı yäşeren räweştä atom bombası yasarğa mataşuda ğäyepli, İran monı kire qağa.
