Accessibility links

Кайнар хәбәр

Qazannıñ tuğrası buldı


Respublikada Yaña yılğa äzerlek tä şaqtıy qızu bara. 23 dekaberdän Qazanda inde çırşılar da açıla, balalar öçen kiçälär dä ütä başladı. Xäyer, bäyräm aldı çaraları balalar öçen genä ütä dip äytep bulmıy, alarnı citdi häm eşlekle keşelär dä oyıştıra. Comğa könne, mäsälän, respublikanıñ Sänäğät oyışmaları berlege Qazan Yärminkäse binasında Yaña yıl bäyräme uñayınnan tantana ütkärde. Kiçägä respublikanıñ premyer-ministrı, öre sänäğät berläşmäläreneñ citäkçeläre çaqıralğan ide. Läkin bäyräm çaraları dip, eş tä onıtılmıy. 24 dekaber könne Älmättä Tatneft’ şirkäteneñ direktorlar Şurası utırışı uzdı. Röstäm Miñnexanov qatnaşlığındağı älege cıyılışta şirkätneñ 2004 yıldağı eşçänlege, kiläse yılğa plannarı, Rusiä häm xalıqara bazarına çığu yulları tikşerelde. Respublika Däwlät şurası räise Färit Möxämmätşin dä 23 dekaberdä Tatarstan teleradiokompaniäseneñ Deputat kanalı isemle tapşıruında Däwlät Şurasınıñ 2004 yıldağı eşçänlege, uzıp baruçı yılnıñ näticäläre turında söyläde, tatarstanlılarnıñ sorawlarına cawap birde. Comğa könne irtän isä Färit Möxämmätşin Sudan respublikası wäkilläre belän oçraştı. Ä kiçkä taba Tatarstan spikerı respublika mäğlümät çaralarınıñ baş möxärrirläre häm Rusiä, çit il agentlıqlarınıñ korrespondentları belän oçraştı. Şulay itep, respublika parlamentı deputatları yal itsä dä, anıñ citäkçese bu könnärdä şaqtıy aktiv eşli.

Ä menä Qazan şähär Şurası deputatları soñğı arada yal itärgä waqıt yuq, alar xäzer bik yış üzläreneñ utırışlarına cıyılalar. Menä comğa könne dä deputatlar çirattağı sessiä eşendä qatnaştılar. 24 dekaber könne alar Qazanda eşliäçäk Qazan ğailäse dip isemlängän programma qabul ittelär. Anı täqdim itkän şähär xakimiäte başlığı urınbasarı Älfiä Tutaeva, programma ğailäne saqlaw, aña yärdäm itü öçen eşliäçäk, dip añlattı. Şulay uq, sessiädä milli tellärne häm mädäniätlärne üsterü öçen oyıştırılğan Ömet waqıfınıñ eş näticäläre dä tikşerelde. Yıllıq xisap belän waqıfnıñ citäkçese Lenar Säläxov çığış yasadı. Qazannıñ meñyıllığı aldınnan iğtibar üzägendä torğan şähärdä säwdäne oyıştıru mäs’äläse dä qaraldı comğa utırışında. Älege temağa çığış yasawçılar isemlegennän şul añlaşıla – Qazan xakimiäte säwdä alıp baruda üz ömetlären uram bazarlarında eşläwçe keçe eşmäkärlärgä tügel, ä zur, zamança eş alıp baruçı üzäklärgä bağlıy. 24 dekaber könne Qazan şähäre nihayät, tuğralı buldı. Berniçä märtäbä qaralğannan soñ sessiäneñ kön tärtibendäge älege mäs’älä deputatlar tarafınnan qabul itelde. Ä menä Qazannıñ Ustavı xäzer inde kiläse, 2005 yılda ğına buldırılır kebek. Comğa utırışında deputatlar anı qabul itmäselär.

Gölnaz İlgizär

XS
SM
MD
LG