BMO general sekretare Kofi Annan, xalıqara cämäğätçelekneñ tsunamida ziyan kürgän töbäklärgä yardäm wağdä itüenä xuplaw belderde, cıyılğan aqçalarnı kiräk maqsatlarğa qullanırğa çaqırdı. Annan'nıñ matbuğat wäkile Fred Eckhard, belderüdä – finans yardämneñ qaya kitkänen küzätü öçen maxsus idarä buldırırğa çaqıru bar, dip xäbär itte. İndoneziä vise-prezidentı Yusuf Kalla, Açeh provinsiäsendä häläkättän soñ yardäm itkän xalıqara xärbi köçlär 3 ay eçendä eşne beterep kitergä tieş, dip belderde. "3 ay – citärlek waqıt, ni qadär tizräk bulsa, şul qadär yaxşıraq," dide Kalla. Cir teträw üzägenä yaqın bulğan häm iñ küp ziyan kürgän Açeh töbägendä Awstraliä, Yaponiä, Malayziä, Singapur häm amerikan ğaskärläre eşli. Parijda Fransiä finans ministrı Herve Gaymard, dönyanıñ kredit birüçe iñ bay illäre – tsunamida ziyan kürgän däwlätlärneñ burıçların tüläwne kiçekterü üteneçen isäpkä alaçaq, dip belderde.
