Sember qalasında qabat saylawlar uzdı. Bu yulı tulayım Şähär Dumasına häm Ölkä qanunnar çığaru cıyılışındağı moña qadär buş torğan ike urınğa.
Bu ike urın tağın da buş qaldı, çönki anda saylawda qatnaşuçılar sanı 25 protsenttan da kim bulmasqa tieş. Ä saylawda nibarı 15 protsent qına qatnaşqan.
Ä Şähär Dumasına saylawlarda Ölkä qanunı buyınça, mondıy çikläw qaralmağan. Şunlıqtan saylaw uzdı, dip sanala. Döres, 13-okrugta “barısına da qarşılar” firqase ciñep çığu arqasında, ber deputat citmäyäçäk – 34 kenä uzdı. Qalğannarında xätta 500 çaması ğına tawış cıyğan kandidatlar da deputat statusına layık buldılar. Şunısı iğtibarnı cälep itärlek – alar arasında ber genä tatar da yuk. 9 tatar balası moña omtılış yasağan bulsalar da. Şulay itep, şähär xalqınıñ 17 protsentın täşkil itkän tatar xalqınıñ Dumada tağın da ber genä wäkile dä yuk. Çönki barlıq okruglarda da tatar azçılıqta. “Naçar yañğıraşlı” familiäle tatar da saylansın öçen, saylawnı milli quriälär buyınça oyıştırıp bulır ide dä bit – üzençälekle ilebezdä mondıy xıyalnıñ tormışqa aşuı mömkin tügel.
Ölkä başlığı Sergey Morozov “Tatneft'” berläşmäse citäkçelege belän üzara xezmättäşlek turında söyläşkän. Moña qadär dä Sember ölkäsendä “Tatneft'”neñ unnan artıq benzin salu stansalarında Tatarstan flağı Räsäyneke belän bergä cilferdi ide. Bu yulı süz citdiräk mäs'älä turında barğan: Sember ölkäse cirendäge niftä qatlamnarın “Tatneft'” belän berlektä üzläşterü turında
Ayrat İbrahim, Sember.
