Accessibility links

Söğüd Ğaräpstanda tarixta berençe saylawlar ütä


Bügen Söğüd Ğaräpstanda saylawlarnıñ berençe turı başlandı. Patşalıqqa demokratiä çatqıları kertergä tırışqan bu ildä ir keşelär cirle şuralarnıñ yartısın saylayaçaq. Söğüd Ğaräpstanda xalıqnıñ yartısın täşkil itkän xatın-qızlar saylawlarda qatnaşa almıy.

Şulay itep Söğüd Patşalığında demokratiägä taba keçkenä genä adım yasaldı. 3 turdan toraçaq saylawlarnıñ berençese bügen başqala Riyadh''ta başlandı. Ämma tawış birü belän qızıqsınu yuq kebek kürenä. Biredä tawış birergä xoquqı bulğan 600 meñ keşeneñ 149 meñe genä terkälgän.

Bilgelänä torğan Söğüd Kiñäş Şurası äğzase Fahd al-Mubarak, Reuters mäğlümat agentlığına, saylawlar bik möhim, dide. Ämma saylawçılarnıñ sanı az buluına borçılu belderde.

"Saylawlarnıñ berençe tapqır ütüe – inde üze möhim fakt. Tawış birüneñ näticäle buluı – anıñ törle töbäklärdä niçek ütüenä bäyle. Saylawlar üzenä cämğiätneñ ziyalı qatlamnarın, yäşlärne cälep itä, bu yaxşı. Eye, qatnaşuçılar sanı tübän, Riydh''ta yuğarıraq san kürergä telär idek, ämma bu da yaxşı," dide Fahd al-Mubarak.

Çit illärdä yäşägän 3 millionğa yaqın söğüd watandaşı saylawlarda qatnaşa almıy, şulay uq bu ildä xatın-qızlarnıñ saylaw xoquqı yuq.

Şulay itep iratlar ildäge 178 cirle şuranıñ yartısın saylayaçaq, yartısı – elekkegeçä bilgelänep quyılaçaq. Namzätlär arasında eşquarlar, qabilä yulbaşçılarınnan başlap ğalimnär häm räsmi keşelärgä qadär bar.

Bügen tawış birü Riyadh''ta ğına uzdı. Anda 37 şuradağı barlığı 127 urın öçen köräşkän namzätlärne sayladılar. Başqaladağı saylaw räsmie Reuters mäğlümat agentlığına, tawış birüneñ tınıç uzğanın xäbär itte.

"Räsmi wäkil bularaq, saylawlarğa äzerlek barışınıñ tınıç ütüe belän min bik qanäğät. Barısı da uñışlı buldı. Xäzer bez inde tawış birü çorına kerdek, bu da tınıç üter, dip ömetlänäm," dide saylaw räsmie.

Saylawlarnıñ 2nçe turı könçığış häm könyaq-könbatış provinsiälärdä 3nçe mart könne ütäçäk. 3nçe häm soñğı turı – könbatıştağı Mäkkä häm Mädinä şähärlärendä, şulay uq tönyaq töbäklärdä – aprilneñ 21renä bilgelängän.

Moña qadär patşa näsele al-Söğüdlär xakimiätne büleşügä qarşı buldı. Söğüdlärneñ qayberläwlär älege tawış birüneñ citdilegenä bik ışanmıy, xakimiättäge köçlärneñ könbatışnıñ demokratiäne üsterü taläplären ütägän bulıp qılanuı digän bäyä birä.

Alsu Qormaş
XS
SM
MD
LG