Düşämbe, 28 fevral', qışnıñ soñğı köne. Qazanda ul şaqtıy xikmätle başlandı. Sinoptiklar yäkşämbedän düşämbegä töndä ük hawanıñ –1 gä qädär cılınuın, qatı qar-burannarnıñ kütärelüen wäğdä itte. İrtänge säğät 7 qayber televidenie kanalları kön cılındı, buran çıqtı, digän xäbär tarattı. Küzeñne televizor ekrannarındağı sannardan alıp, täräzägä qarasañ, anda cilsez, 15-16 gradus salqın hawalı irtä ide. Döres, wäğdä itelgän buran köndez quzğala başladı, hawa da cılına töşte.
Menä şulay siklonnıñ tönyaq-könbatıştan İdel-Uralğa kilüe, hawa üzgärtüe säyäsätneñ Mäskäwdän Qazanğa tä'sir itüenä oşap tora. Bu könnärdä qış axırı ğına tügel, millät tormışındağı çor axırı.
Düşämbe könne “Tatmedia” agentlığında pensiälärne arttıru turında press-konferensiä buldı. Toraq reforması häm fatir bäyäläre üzgärü dä keşelärneñ yöräklären çänçi. Sotsial' yaqlaw xezmätkärläre añlatırğa, sorawlarğa cawap birergä tieş. Qänäğätländeräme bu cawaplar, yuqmı – anısı ikençe mäs'älä. Yöräklärneñ cilkengän, küñellärneñ borçılğan çağında nindi yañalıqnıñ kemgä niçek tä'sir itüen aldan äytep tä bulmıy. Düşämbe könne Piramida tamaşalar zalında Yıl citäkçese-2004 bäygeseneñ näticäläre iğlan itelde. İñ zur uñışqa ireşkän eşquarlar, şirkätlärneñ, däwlät oyışmaları citäkçeläre prezident Şäymiev, premyer-ministr Miñnexanov qulınnan diplomnar aldı.
Soñğı könnärdä Qazan cämäğätçelegeneñ iğtibar üzägendä Däwlät Sovetınıñ utırışında prezidentnı östän bilgeläp quyu turında tözätmälär qabul itelü diärgä bula. Ämma, matbuğatta, televideniedä “Turetskiy gambit” fil'mınıñ premyerası, Başarov belän Kutsenkonıñ Qazanğa kilep, tamaşaçılar belän oçraşu, Peterburgta 4 vagonlı metro poyezdın Kamil İsxaqov qabul itep alu yışraq häm zurlap kürsätelde.
Tatarstan gerbına quyılğan aq barsnıñ näsele qoru qurqınıçı bar. Häm bu xaqta Xalıqara Ekologik fond, Altay tatarları, turistik oyışmaları çañ suğa. Tatarstan da, tatarlar da üzeneñ tuğrasına kergän canwarnıñ yazmışına bitaraf bulıp qalmas. Ämma haman milli añı yuğarı bulğan demokratik ruxlı keşelär uzğan comğada ütkän sessiä turında uylıy. Respublikanıñ prezidentı xäzer inde xalıq tarafınnan saylanmıy, östän täqdim itelä häm cirle parlamentta raslana. Şul xaqta “Watanım Tatarstan” gäziteneñ şimbä sanında İlsöyär Xäyrullina sızlanıp yazıp çıqtı. Qayber deputatlarnıñ şuşı tarixi yuğaltuğa tetränüläre işetelgäläde. Şul uq xälgä bötenläy iğtibar itmägän yäki işetmämeşkä salınğan şäxeslär häm mäğlümat çaraları da bar. Rus häm tatar telendäge yäşlär gäcitläreneñ ikese dä şimbä sannarında comğa sessiäse turında ber süz dä äytmäde. Tatarstannıñ abruylı, räsmi telekanalınıñ rusça çığarılışında Gildeeva familiäle jurnalist sessiä yomğaqları turında comğa könne şundıy xäbär birde- deputatı, ne upustili vozmojnost' posporit' na temu respubliki. Ä bit bik küplär bäxäs tartışsız ğına referendum yomğaqlarınnan, prezident saylaw xoquqınnan baş tartuğa riza tügel. Min köräşergä äzer diüçelär yış işetelde soñğı 2-3 köndä.
Rimzil Wäli
