Accessibility links

Ğosman Sadä : “Taşqınnar da yua almıy xalıq xäteren...” “Şähri Qazan”


29 martta Tatarstan Yazuçılar berlegeneñ Ğ.Tuqay klubında kürenekle tatar-başqort yazuçısı Şäexzadä Babiçnıñ tuuına 110 yıl tuluğa bağışlanğan ädäbi- muzıkal' kiçä uzdı. Şäexzadä Babiçqa bağışlanğan mondıy çaralar Qazanda bıyıl berençelärdän genä tügel. Anıñ tuğan könendä, ğinwar ayında Tatarstan fännär akademiäsendä fänni konferensiä,Ğ.Tuqay muzeenda ädäbi muzıkal' kiçä uzğan ide. Häm menä älege Ğ.Tuqay klubında uzğan ädäbi- muzıkal' oçraşu kiçäse turında yazuçı, şağir häm anıñ yaqtaşı Ğosman Sadä bu comğada çıqqan “Şähri Qazan“ gäzitendä mäqälä bastırğan. Mäqälä “Taşqınnar da yua almıy xalıq xäteren...”dip atala. Oçraşunı Yazuçılar berlege räise Foat Ğalimullin açıp cibärä. Häm anıñ urınbasarı Ğalimcan İbrahimov kürenekle şağirneñ icatı häm tormış yulı belän tanıştıra. Tantanada tatar xalıq cırları häm milli köylär dä yañğırıy. Älege çarağa Tatarstannıñ xalıq artistları Ayrat Arslanov, İldus Äxmätcanov, Xälim Cälälov, Miñğol Ğaliev, Zöhrä Säxäbieva, häm İskändär Biktahirov ta; yazuçılardan Robert Äxmätcan, Mödärris Äğlämov, Batulla üz fikerläre belän urtaqlaşalar. Xäzer Ğosman Sadä bastırğan mäqälädän özeklär tıñlağız.

“ Uqıp ta , işetep tä beläbez : çın şağirlär tormışı totaş faciğälärdän genä tora. Tarixta monıñ misalları bixisap”,-dip tezep kitä mäqälä avtorı faciğäle wafat bulğan icat keşelären. Babiçnıñ böten faciğäle yazmışı da änä şunda. Anı aqlar cırçısı dip tä atadılar. Ozaq waqıtlar däwamında isemen telgä dä almadılar. Xalıq xäterennän cuyıp alırğa tırıştılar. Axır kilep, üleme dä qızıllar qulı belän başqarıldı. Äsirlekkä töşkän şağirne imgätkänçe qıynıylar. Tere kileş at qoyrığına tağıp, cirdän österäp yörtälär. Änä şulay itep anı, millätçelektä ğayepläp, cäzalap üterälär. Nigäder bezdä millätçelekne yamanlarğa yaratalar. Üz milläteñne, üz xalqıñnı canıñ –täneñ belän söyü, anıñ xaqına utqa da , suğa da kerergä äzer bulu “xalıq doşmanı” digän bilgelänerlek şundıy da naçar sıyfat mikänni? Yuğisä asıl mäğnäsendä xalıq şağire, millätçe dip äytergä yaramasa, millätpärvär şağir bulıp qaldı.”

Xörmätle radio tıñlawçılar, sez matbuğat közgese tapşıruında Şähri Qazan gäzitendä Ğosman Sadäneñ Şäexzadä Babiç turında “Taşqınnar da yua almıy xalıq xäteren”,- digän mäqäläsen tıñladığız. Azatlıq radiosı Mälikä Basıyr Qazan.

XS
SM
MD
LG