İran belän Törkmänstan prezidentları Möhammäd Xatami häm Saparmorat Niyazov bügen çik buyındağı yılğada "duslıq" buası açılışında qatnaştı. İranda yılğanıñ iseme – Harir, Törmänstan yağında – Tejen.
Tantanada çığış yasap Niyazov, älege bua su qıtlığı problemasın xäl itäçäk, dip belderde:
"Törkmänstan su qıtlığı turında belä. Monı istä totqanda Duslıq buası İrannıñ Meşed şähäre häm bezneñ ixtiyaclarnı da qänäğätlenderäçäk. Bu sunı şulay uq 25 meñ hektar cir öçen qullanıp bulaçaq, anda mamıq häm boday üsäçäk, şulay uq kötülek öçen cir bulaçaq" dide Törkmänstan prezidentı.
Küpçelege İran belgeçläre tarafınnan tözelgän älege buanıñ bieklege – 75, ozınlığı – 600 metr. 60 million dollarlıq xisabın ike il büleşkän. Älege urtaq proekt ike ilneñ dä cirlären sulandıru häm energetika ölkäsendä tiränräk xezmättäşlekkä yul açır dip farazlana.
