Tatarstanğa Rusiäneñ awıl xucalığı ministrı Aleksey Gordeev häm Rusiä prezidentınıñ yärdämçese Aleksandr Abramov kilde. Comğa könne alar respublika citäkçelege belän Älki rayonında buldı. Monda qunaqlar Qızıl Şärıq-Agro şirkäte täcribäse nigezendä Tatarstanda eşläp kilüçe öre agrokompaniälärneñ eşçänlege belän tanıştı, alarnıñ täcribäsen Rusiäneñ başqa töbäklärenä taratu turında söyläşte.
Respublika Däwlät Şurası da bu könnärdä bik aktiv eşli. Şuranıñ sotsial’ säyäsät komissiäse wäkilläre 22 aprel’dä Bögelmädä buldı. Monda alar Tatarstan xökümäte äğzäläre belän bergälektä Rusiädä 2005 yılnıñ 1 ğinwarınnan ğämälgä kergän monetizatsiä, taşlamalarnı aqçalata tüläwlärgä alıştıru turındağı qanunnıñ ütäleşe xaqında kiñäşläştelär. Şulay uq Bögelmädä uzğan cıyılışta respublikanıñ adreslı sotsial yärdäm qanunınıñ ütäleşe, respublikadağı sotsial’ xäl dä tikşerelde.
Ä menä Däwlät Şurasınıñ mädäniät, fän, mäğärif häm milli mäs’älälär komissiäse comğa könne Tatar teleneñ terminologiäsen kamilläşterü problemaları dip isemlängän respublika fänni-ğämäli konferensiäsen ütkärde. Anda deputatlar, respublikanıñ xökümät wäkilläre, tel belgeçläre, ğalimnär, jurnalistlar qatnaştı. Konferensiädä tatar teleneñ qullanışın kiñäytü, bu eştä Tatarstannıñ tellär turındağı qanunınıñ role, yaña mäğlümäti texnologiälärdä tatarça terminnarnı buldıru, tatar ädäbi teleneñ döres äyteleş häm yazılış mäs’äläläre, süzlär häm süzleklär tözüdä qıyınlıqlar, räsmi dokumentlarnı tatar telenä tärcemä itü problemaları tikşerelde.
İbrahimov isemendäge Tel, ädäbiät hä sänğät institutınıñ fänni xezmätkäre Döriä Ramazanova terminologiä eşen kamilläşterü öçen äybät tärcemäçelär äzerlärgä kiräklege turında äytte. Ä menä professor Rüzäl Yusıpov Mäğlümät çaraları häm söyläm kul’turası digän temağa çığış yasap, tatar jurnalistların tänqitläde. Ul qäläm ostaların döres yazmağan, söylämägän öçen dä, tatar variantları bulmağan oçraqta yaña süzlär uylap çığarıp, iskelärne qullanğan öçen dä tänqitläde.
Gölnaz İlgizär
