Tatarstan prezidentı Zilä Wälievanı premyer ministr urınbasarı, mädäniät häm massaküläm kommunikatsiälär ministrı itep bilgelärgä täqdim itte digän isem astında bügen Tatar –inform mäğlümat agentlığı xäbär tarattı. Şulay itep, säyäsätçelär arasında soñğı könnärdä bik yış quzğatılğan mä’sälä – Tatarstannıñ yaña xökümäte niçek bulır, kemnär ministr, vitse-premyer häm älbättä inde premyer ministr bulır digän söyläşülärgä räsmi açıqlıq kertelde.
Pänceşämbedä, Tatarstan Däwlät Şurasınıñ daimi komissiä utırışlarında Respublika xakimiätendäge berençe postlarnı kemgä tapşıru mäsäläse qaraldı. Küzätüçelär, prezident, premyer-ministr itep Röstäm Miñnexanovnı täqdim itäçägenä şiklänmilär ide häm bu şulay bulıp ta çıqtı. Anıñ berençe urınbasarı bulıp Rawil Moratov täqdim itelä. Älegä qädär dä premyernıñ berençe urınbasarı bulıp distä yıllar eşläp kilgän Rawil Moratov, yaña xökümättä berençe urınbasarlıqnı tağın ber keşe belän bergä başqaraçaq. Ul Boris Pavlov. Älegä qädär xökümättä ber genä berençe urınbasar ide. Boris Pavlovka kilgändä, ul moña qädär İqtisat häm sänäğät ministrlığınıñ Qazandağı komitetı räise ide. Monnan tış, vitse-premyerlar bulıp Vladimir Şvetsov, ul transport häm yul xucalığı ministrlığın da citäkläyäçäk häm Marat Äxmätov, şulay uq awıl xucalığı häm azıq-tölek ministrlığına citäkçe itep tä täqdim iteldelär.
Parlamentnıñ daimi komissiäläreñ urtaq utırışında bu nämzätlär xuplandı häm däwlät şurasınıñ comğada bulaçaq çirattağı sessiäsendä deputatlarğa, älege kandidatlarnı raslarğa digän täqdim kertelde.
Monnan tış, Däwlät Şurası räise Färit Möxämmätşin Tatarstan Prezidentı Apparatınıñ elekke citäkçese Äğzam Ğöbäydullin kandidaturasın Rusiä Federatsiä Şurasına Tatarstan wäkile itep saylaw öçen täqdim itte. Älege kandidaturalar buyınça soñğı qarar comğada parlamentınıñ utırışında qabul iteläçäk.
Parlamentnıñ berniçä komitetınıñ berläşterelgän utırışı tämamlanuğa, Zakonlılıq, reglament häm deputat etikası, Ekologiä, tabiği resurslar häm cirdän faydalanu, Mädäniät, fän, mäğärif häm milli mäs''älälär komitetları utırışı buldı. Premyer-ministr häm anıñ urınbasarları nämzätläre buyınça Prezidentı täqdimnären qaradı.
Älege utırışta prezident tarafınnan tağın ber vitse –premyerlıqqa täqdim itelgän Zilä Wälieva nämzäten qaraw planlaştırılğan ide . Bügenge ul köndä şuşı wazifanı başqara da inde. Läkin, yaña xökümättä aña, vitse premyerlıqtan tış, mädäniät häm massaküläm kommunikatsiälär ministrı wazifaların da birergä cıyınalar. Älege mä’sälä, kön tärtibennän töşerelde. Däwlät Sovetı Räise Färit Möxämmätşin monı “vitse-premyerlıq wazifası, ministr eşçänlege belän bergä alıp baruğa bäyle räweştä isemen yuridik yaqtan döres räsmiläşterü turında soraw tuğan”dip añlattı. TR Premyer-ministrı urınbasarı wazifaların başqaruçı Rawil Moratov süzlärençä, massaküläm kommunikatsiälär häm mädäniät belän bäyle yaña ministrlıqnıñ iseme turındağı mäs''älä buyınça älegä fiker alışına. TR “Tatmedia” massaküläm kommunikatsiälär agentlığı yaña ministrlıqqa bülekçä sıyfatında keräçäkme digän sorawğa Rawil Moratov uñay cawap birmäde. Şul uq waqıtta “törle variantlar qarala”dip belderde. Älege mäs''älä comğa könne irtänge yaqta xäl iteläçäk häm Mädäniät, fän, mäğärif häm milli mäs''älälär komitetında qaralaçaq.
Premyer-ministrı häm anıñ urınbasarlarına nämzätläre buyınça azaqqı qarar irtägä Däwlät Şurası utırışında qabul iteläçäk. Bu xaqta Tatar-inform mäğlümat agentlığı xäbär itte.
Räfis Cämdixan
