Accessibility links

Кайнар хәбәр

Ramil Bignov: Natsional-bol'şeviklar belän ber genä dä urtaq eşebez yuq


Oppozitsiä belän Başqortstan xaqimiätläre älegä üzara tatulıq saqlaw turında kileşsä, prezident Mortaza Räximovnıñ säyäsäte belän kileşmäw çaraları Mäskäwdä törle çığışlar belän däwam itä.

Kiñküläm mäğlümat ağentlıqları atnaqiç könne Başqortstannıñ Mäskäwdäge Daimi wäkilçelege binası yanında Rusiäneñ Natsional-bol'şewiklar partiäse äğzalarınıñ qarşılıq çarası ütkärüe xaqında xäbär tarattı. 5 kenä keşedän torğan bu törkem Mortaza Räximovqa qarşı yünältelgän şigärlär totıp, xätta ul yazularnı Başqortstan wäkilçelegeneñ balqonına elärgä dä ölgergän. Ämma alarnıñ öçesen tiz arada kilep citkän militsiä xezmätkärläre qulğa alğan.

Başqortstannıñ Mäskäwdäge Daimi wäkile urınbasarı Abbas Ğallämov äytüençä, qulğa alınuçı yäşlärneñ berse üzlären Başqortstan oppozitsiäse, atap äytkändä Ramil Bignov finanslawın äytkän, imeş. Şuşı belderügä açıqlıq kertü öçen bez Ramil Bignov belän telefon aşa elemtägä kerdek. «Bez berqayçan da natsional-bol'şewiklar belän aralaşmadıq, alar belän hiçnindi urtaq eşlärebez yuq, – di Ramil äfände. – Bu älege dä bayağı Mortaza Räximov yarannarı tarafınnan, oppozitsiäne cämägätçelek aldında pıçratu maqsatında, oyıştırılğan çirattağı prowoqatsiä. Şuña kürä bu yalğanğa östämä añlatma birep torunı da kiräk sanamıym».

Şulay itep Mäskäwdä Başqortstan oppozitsiäsenä qağılışı bulmağan başqa köçlär dä Mortaza Räximov säyäsätenä rizasızlıq belderäme, ällä bu çınlap ta maxsus oyıştırılğan astırtın eşme, añlawı qıyın.
XS
SM
MD
LG