Ğiraqta soñğı yartı ğasırda berençe märtäbä demokratik saylawlar näticäsendä xakimiätkä kilgän yaña xökümät bügen tantanalı ant birde. Tantana Bağdadta Qörän sürälären uqu belän başlandı. Premyer ministr İbrahim Jäğfäri xökümäte amerikannar bilgeläp quyğan İyad Älläwi xakimiäte almaştıra.
AQŞ xärbiläre äytüençä ğisyançılar üzäk Ğiraqta koalitsiä köçlärenä höcüm itkän. Atışlarda 12 ğisyançı, ber ğiraq soldatı häm 2 sivil ğiraqlı ülgän. 2 AQŞ xärbie dä yaralanğan. 5 suğışçı totılğan. Atışlar Bağdadtan 115 çaqrım könbatıştağı Ramadi şähärendä ğisyançılar AQŞ xärbilärennän häm Ğiraq soldatlarınnan torğan xärbi pozitsiägä höcüm itkännän soñ başlanğan.
Ğiraqta yuğalğan 2 AQŞ oçuçısınıñ berse bügen üle kileş tabıldı. Uzğan töndä AQŞ xärbiläre Ğiraq kügendä ike F-18 höcüm oçqıçın yuğalttı. Xärbilär äytüençä, älege oçqıçlar belän elemtä yuğalğan waqıtta ul töbäktä doşman utı kürenmägän.
