Accessibility links

Кайнар хәбәр

Başqortstanda cirle üzidärä saylawlarına soñğı äzerleklär bara


Bu yäkşämbedä Başqortstanda urındağı üzidärä orğannarına saylawlar ütäçäk. Respublik rayonnarında häm şähärlärendä äle bu qampaniägä äzerlekneñ soñğı mäşäkätläre bara. İñ aptıratqanı şul – älege saylawlar xaqında räsmi matbuğat basmalarında häm xökümät qaramağındağı radio, telewidenie qanallarında onıtqanda ber genä iskä alalar. Ä bit moñarçı bulğan saylawlarğa berniçä ay aldan uq räsmi mäğlümat çaraları höcümçän äzerlek başlıy, propağanda alıp bara ide. Bu yäkşämbedä uzaçaq saylawlarğa şulay tınıç häm xätta bitaraf qarawnıñ säbäplären törleçä añlatalar. Şul säbäplärneñ berse – älege saylawlarnıñ aldan uq xaqimiätlär faydasına bulaçağı. Respublik citäkçelege rayonnardağı tuğrılıqlı xezmätçeläre yärdämendä tieşle näticägä ireşäsenä 100 protsent ışana, şuña kürä dä älläni tırışlıq kürsätmi häm aqçasın da sarıf itmi.

Saylawlar ğomum alğanda şulay tınıç ütär kebek toyılsa da, Ufa şähär sowetına deputatlar saylaw alay uq tınıç bulmas kebek. Çönki bu saylawlarğa äzerlek barışınnan uq kürenüençä, bik ğawğalı häm qara piar qullanu belän dan aldı ul. Saylawlar könne dä törle ığı-zığılar buluı bik tä ixtimal, dilär säyäsi küzätüçelär. Mäğlüm buluınça, Ufa şähär sowetına nibarı 35 keşe saylana, ä däğwaçılar sanı 200 tiräse. Şulay itep, ber urınğa 6-7 keşe turı kilä. Köräş tä qızu bulaçaq, saylaw ütkäç tä äle mäxkämäläşülär belän anıñ qaytawazı ozaqqa suzılırğa mömkin.

Comğa könne deputatlıqqa däğwa itüçelärgä ağitatsiä öçen soñğı mömkinlek birelde. Şimbä könne inde qanun buyınça härtörle ağitatsiä çaraları tıyıla.
XS
SM
MD
LG