Accessibility links

Кайнар хәбәр

"Sibneft"ne satıp alğan "Gazprom" dönyadağı neft bazarına çığa


Mäğlüm magnat Roman Abramoviçneñ "Sibneft" şirkäte däwlät qulındağı "Gazprom" qaramağına küçä. Çärşämbe könne ireşelgän şuşı kileşüneñ bäyäse 13 milliard dollardan artıp kitä. Başında Vladimir Putin torğan däwlät xakimiate xäzer Rusiädäge neft çığarunıñ öçtän beren turıdan-turı kontrol itäçäk. Kileşü üze Rusiä tarixında iñ zur korporativ alış-bireş bulıp tora.

Kileşüdä qaralğança, "Gazprom" Abramoviç qulındağı Millhouse Capital şirkätennän "Sibneft" xissäläreneñ, yäğni aksiäläreneñ 72.7 protsentın satıp ala. İke yaq ta çärşämbedä bu xaqta ber-berseneñ qatği yöklämälären bilgelägän kileşügä imza quyuın xäbär itte. Moña qädär "Gazprom"nıñ "Sibneft"tä 3 protsentlıq qına öleşe bar ide, xäzer inde bu san şulay itep 75 protsentnı uzıp kitä.

Şuşı kileşü dönyadağı iñ ere gaz tabuçı şirkätneñ dönya bazarında üze satqan çimalnı törleländerergä tırışuın häm şunıñ aşa dönyaküläm ber şirkätkä äylänergä teläwen kürsätä. Mäskäwdä urnaşqan Sovlink investitsiä yortı belgeçe Eric Kraus fikerençä, bıyıl däwlät qulındağı "Rosneft" şirkäten üzenä satıp ala almağannan soñ, "Gazprom" öçen "Sibneft"ne üz qulına töşerü ayıruça zur ähämiatkä iä ide.

"Gazprom" öçen bu kileşü anıñ energiä ölkäsendä dönyaküläm ber uyınçığa äylänüen añlata. "Gazprom" başta "Rosneft"ne satıp alırğa telägän ide, ämma ul moña ireşä almadı. Şuña kürä xäzerge kileşüne üzenä beraz neft telägän "Gazprom" öçen ber küñel yuatu büläge dip qararğa bula", di investitsiälär belgeçe Eric Kraus "Gazprom"nıñ "Sibneft"nı satıp aluı turında.

Xäzer inde "Gazprom" könenä 900 meñläp miçkä neft çığarıp, Rusiäneñ 5-nçe ere neft şirkätenä äylänäçäk, yäğni "Tatneft" häm "Başneft"ne dä uzıp kitäçäk. "Alfa Bank"tağı ölkän belgeç Chris Weafer, "Sibneft"ne "Gazprom"ğa quşıp däwlät xäzer Rusiädäge neft çığarunıñ öçtän ber öleşen üz qulına tuplıy, çönki "Gazprom" üze asılda däwlät qulındağı şirkät bulıp tora, di:

"Älege kileşü xökümätneñ neft ölkäsendäge turıdan-turı mölkäten arttıra, xäzer inde däwlät qaramağındağı yäisä däwlät bilägän şirkätlär Rusiädä köndä çığarılğan neftneñ öçtän-bere öçen cawaplı bulaçaq. Moña tağın däwlätkä bik uñay qarağan şirkätlärne östäsägez, älege san 50 protsentqa citäçäk", di Chris Weafer.

"Gazprom"nıñ "Sibneft"ne aluı belgeçlär öçen yañalıq bulmadı - bu xaqta söyläşülär baruın Vladimir Putin industrial'' "sigezlek"neñ Şotlandiädä uzğan oçraşuında uq xäbär itkän ide. Weafer, "Sibneft"ne däwlätkä qaytaru xökümätkä neft häm gaz satudan kilgän aqçanı sotsial" programmalarğa yullap, xalıq arasında kiñräk yaqlaw qazanuğa yardäm itä ala dip isäpli. İkençe yaqtan Kreml'', di Alfa Bank belgeçe, yağulıq çimalların üz qulında tuplap dönyadağı urının da nığıtırğa tırışa.

"Rusiä xökümäte üzeneñ Könbatış illäre belän säwdä itüendä şaqtıy möhim partnerğa äylänüen sizä häm äytik "sigezlek" oçraşularında qatnaşa aluı öçen ähämiaten atom qoralınnan başqa da arttıru mömkinlege buluın añlıy", di Chris Weafer.

"Gazprom"-"Sibneft" kileşüe tağın şunıñ belän dä qızıqlı - däwlät anı xäzer bazar bäyäsenä, 13 milliard 100 million dollarğa satıp ala, ä 10 yıl elek ul anı Roman Abramoviç häm anıñ säwdä partnerı Boris Berezovskigä barı tik 100 million diollarğa ğına birgän ide. Belgeçlär fikerençä, Roman Abramoviç asılda üzendäge xissälärne berär Könbatış şirkätenä zurraq bäyägä dä sata alır ide, läkin Mixail Xodorkovski yazmışı sürätendä ul üze öçen iminräk yulnı saylarğa buldı. Yänä Eric Kraus söyli:

"Küräseñ, Kreml'' aña satarğa quşqandır. Häm alar aña yaxşı ğına bäyä dä täqdim itkän. Ul anı berär Könbatış şirkätenä satqan bulsa, anıñ kübräk aqça qazana aluı şik uyatmıy, ämma Putin xäzer inde Rusiädäge strategik çimallarnıñ çit il şirkätläre qulına küçüen telämi", di Kraus, investitsiälär belgeçe.

38 yäşlek Roman Abramoviç Rusiäneñ iñ bay keşese sanala häm üz businessınnan tış ul Yıraq Könçığıştağı Çuqıt ölkäsen dä citäkli.

Kärim Kamal
XS
SM
MD
LG