Bu könnärdä Yekaterinburg şähärendä Tatarstannıñ Uraldağı daimi wäkillege avgust ayında uq iğlan itkän “Sverdlovski ölkäsendä Qazannıñ meñyıllığı könnäre” tämamlandı.
Ay yarım eçendä bu könnär qısasında bik zur külämle, köçle çaralar oyıştırılğan ide. Alarğa qısqaça ğına küzätü yasap ütsäk, bu çaralar Tatarstannıñ Uraldağı daimi wäkile Rawil Bikbovnıñ Sverdlovski ölkäsendä zur tiraj belän bastırıla torğan “Ölkä gazetası” isemle räsmi gazeta bitlärendä uquçılar belän turıdan-turı söyläşüe belän başlanıp kitkän ide. Gazeta uquçılar Qazannıñ meñyıllığı datası niçek bilgelängän, tatar dönyası, Tatarstan belän Sverdlovski ölkäse arasındağı bäyläneşlär turında mäğlümat häm başqa üzlären qızıqsındırğan sorawlarğa cawap aldılar. Sverdlovski ölkäse xökümäte räise urınbasarı Semen Spektor häm Tatarstannıñ Uraldağı daimi wäkile Rawil Bikbov qatnaşında uzdırılğan matbuğat konferensiäsenä ölkä külämendä eşläp kilüçe bik küp massaküläm mäğlümat çaraları cıyıluı da Qazanğa häm Tatarstanğa qarata jurnalistlarnıñ qızıqsınuçanlıqları zur ikänlegen kürsätte.
Meñyıllıq atnasında här könne daimi wäkillek ölkäneñ törle poçmaqlarınnan räsmi delegatsiälär qabul itte. Cirle xakimiät başlıqları citäklägän bu delegatsiälär, Ural başqalası üzägendä urnaşqan Tatarstan cirendä qunaqta bulğannan soñ, Qazannıñ meñyıllığı waqiğası tä''sirlären üz töbäklärenä dä alıp qaytıp, xalıqqa citkerergä tırıştılar. Äytik, Berezovskiy şähäre xakimiäte başlığı, Yekaterinburgtağı bu bäyrämdä bulıp qaytqannan soñ, üz şähärendä dä bik zurlap Qazanğa, Tatarstanğa, tatarlarğa bağışlap bäyräm oyıştırdı.
Sentäber buyına wäkillek binasında, başqa maxsus kürgäzmälär belän berrättän, Qazan şähärenä bağışlanğan balalar räsemnäre kürgäzmäse oyıştırılğan ide. Sverdlovski ölkä töbäkne öyränü muzeenda ay buyı ike aradağı tarixi bäyläneşlärne çağıldıruçı “Qazan-Yekaterinburg” kürgäzmäse eşläde. Sverdlovski ölkä millätara kitapxanäsendä uzdırılğan oçraşular da Qazannıñ meñyıllığı waqiğasına bağışlandı.
Bu çaralar barısı da Qazan belän Yekaterinburg arasındağı tarixi bäyläneşlärne nığıtuğa yünältelgän ide.
Bu könnärdä tağın bik zur ähämiätkä iä bulğan waqiğa bulıp uzdı - Tatarstannıñ daimi wäkillege binasında Rusiä fännär akademiäseneñ Ural bülekçäse räise, akademik Waleri Çereşnev citäkçelegendä Ural fännär akademiäse prezidiumı äğzaları, zur ğalimnär bulıp kittelär.
Oçraşu waqıtında qunaqlar wäkillek binası, anda urnaşqan tarixi muzey, Qazannıñ meñyıllığına bağışlanğan maxsus kürgäzmälär belän tanıştılar. Räsmi sälämläw çığışlarında Waleri Çereşnev häm Rawil Bikbov Tatarstan belän Ural cire arasındağı üzara faydalı xezmättäşlekne üsterügä basım yasadılar.
Monnan ike ğasır elek Qazan universitetı açılıp eşli başlaw belän ük, Yekaterinburg belän Qazan arasındağı fänni elemtälärgä nigez salınğan. Bu tarixi bağlanışlar bügen dä däwam itep, üzeneñ cimeşlären birä, di Valeri Aleksandroviç. Sentäber ayında ike töbäkneñ dä yuğarı uqu yortları arasındağı konsorsium turındağı Kileşügä qul quyıldı. Çereşnev äytüençä, soñğı waqıtta urtaq fänni-mäğärif Üzäk buldıru, Ural ğalimnäreneñ qayber fänni eşkärtmälären Tatarstan cirendä qullanu turında söyläşülär alıp barıla. Bu waqiğağa Tatarstan prezidentı Mintimer Şärip ulı üze zur ähämiät birä, dide Valeri Aleksandroviç.
Qunaqlar öçen “Kügärçen” balalar ürnäk ansamble bik matur konsert programması äzerlägän ide. Konserttan soñ alarnı milli rizıqlar belän mul itep äzerlägän tatar çäye östäle yanına çaqırdılar. Oçraşu şulay bik cılı, dustanä atmosferada uzdı.
Tatarstannıñ Uraldağı daimi wäkile Rawil Bikbov äytüençä, Ural cirendä Qazannıñ meñyıllığı könnäre şuşındıy zur ähämiätkä iä bulğan çara belän tämamlanuı Tatarstan belän Ural arasındağı bäyläneşlärneñ tağın da yuğarıraq basqıçqa kütärelüen kürsätä.
Fäwiä Safiullina, Yekaterinburg
