Ütkän tapşıru efirğa äzerlängän waqıtta «Tatnet yoldızları-2005» bäygesendä ciñüçelär bilgele tügel ide äle. Alar xäzer dä bilgele tügel, ämma kem büläklärne alaçaq, inde şäylänä başladı. Bäygene oyıştıruçılarnıñ berse, Aynur Sibgatullin, atna axırında finalça çıqqan saytlarnıñ isemnären kiñ cämäğätçelekkä täqdim itte. Alarnıñ isemnäre turında tapşıruıbızda xäbär itkän idek. Xäzer, Aynurnıñ saytında, forum bülegendä internetçılar arasında tawış birülär bara. Ciñüçelärne barıber juri bilgeli, ämma bu tawış birü arqılı internet cämäğätçelekneñ fikeren dä belep bula. İsegezdä bulsa, bäygedä 2 nominiatsiädä, «Tuğan tel» häm «Mäğlümat çarası» törlärendä tatar telendäge saytlar yarışa. «Qazannıñ 1000 yıllığı», «Tatar dönyası», «Tatarstan respublikası», «Xobby» digän nominatsiälär urıs telendäge säxifälär öçen oyıştırılğan ide. Bäygeneñ här törendä, 5 iñ yaxşı sayt saylap alınğan bulğan, şuşı 5 sayt arasında berençe, ikençe, öçençe urınnar saylanıp alaçaq.
Juri älegä fikeren äytmäde, xäzergä forum.tatar.info saytında tawış birüdä qatnaşırğa, hiç yuğı näticälär belän tanışıp çığarğa bula. İnde xäzer şunı äytep bula, tawış birü näticälärenä qarağanda, Çexiä tatarlarınıñ internet säxifäse www.tatar.cz saytı berençelkne saqlap bara. Ul üzeneñ köndäşlären, tatarça on-line süzlekne, milli teldä eşlärgä mömkinlek birüçe programmalarnı tuplağan tatarça soft säxifäsen häm internet-kibetne uzıp bara. İntenretta çıqqan gäzitlär arasında berençe urında älegä Ästerxan tatarlarınıñ internet säxifäse, «Xacitarxan» saytı bara, ul tawışlar sanı belän «Kuray» radiosı, «Tatar-inform» agentlığınıñ internet säxifäsen uzdı. «Tatar donyası» nominatiäsendä tawış birüdä iñ küp keşe qatnaşqan. Baştaraq berençe urında qırım tatarlarnııñ internet säxifäse iñ küp bal cıyğan ide, soñğı minutlarda berençe urında tatarica.yuldash.com saytın kürep bula. Yarışınıñ «Qazannıñ 1000 yıllığı»na bağışlanğan törendä, berençe urınğa www.1000kzn.ru digän säxifä layıq, dip tabıldı. İsegezdä bulsa, bu Rusiä ministrlığınnan grant alıp eşlägän avtorlar kollektivı, anda iñ operativ häm tulı räweştä Qazannıñ 1000 yıllığına bağışlanğan bäyräm çaraları yaqtırtılıp bardı. Bu häm aldaraq telgä alınğan säxifälär turında «Tatnet» tapşıruında, yıl buyı söyläp bardıq. İnternet belän qızıqsınmıy torğan keşelär öçen, bu bäyge bälkem qızıq ta tügelder. Ämma internetta saytlar yasawçı entuziast yegetlär öçen, forumnarda yorüçelär öçen, bu bäyge näticäläre bik möhim. Çönki, ozaq waqıt sarıf itep, berämläp, börtekläp mäğlümat cıyıp, tırışlıq küep eşlägän eşne kürü häm bäyäläw Tatnetçılar öçen bik kiräk. Yäşlär şuşı yaña ölkädä üzlären kürsätä, ostalıqqa ireşä. Bu xaqta forumdağı söyläşülärneñ eçtälege dä söyli. Beräwlär, nigä fälän saytnı sayladığız, nigä monsın töşerep qaldırdığız, dip oyıştıruçılarğa daimi räweştä, däğwä belderä. Bik yuğarı professional däräcädä internet säxifälär yasağan keşelär dä, bu eştä berençe adımnarnı yasağan keşelär dä, ciñügä bulmasa da, kollegalarnıñ iğtibarına ömetlänä. Sayt xucaları yıl buyı bu bäygene häm anıñ näticälären, tüzemsezlek belän kötä. Şulay itep, «Tatnet yoldızları -2005» bäygeseneñ räsmi bulmağan tawış birülärendä www.1000kzn.ru, saytı, Çexia tatarları saytı www.tatar.cz, www.xacitarxan.ru Ästerxan tatarları säxifäse, älegä berençe urında bara. «Tatnet yoldızları-2005» bäygeseneñ Juri wäkilläre, nindi saytlarnı ciñüçe itär, yaqın könnärdä belerbez. Tatar telendäge häm tatarlar turındağı internet säxifälär başqa küp törle internet dönyasında çittä tora almyı. Bu könnärdä, www.pedsovet.org saytında, internet uqıtuçılar kiñäşmäse bardı. Bu xaqta ütkän tapşıruda söylägän idek inde. Uqıtuçılar köne häm İnternet pedsovetqa yomğaq yasaw bu atnada buldı, şuña kürä bu temağa yañadan qaytırğa buldıq. Rusiäneñ törle poçmaqlarında eş itüçe uqıtuçılar şuşı hönärdäşläre saytına kerep, ber bersen uqıtuçılar köne belän qotladı. Saytı yazılğança, räsmi pedsovet tämamlansa da, sayt eşen däwam itäçäk, häm forumda başlanğan söyläşülär äle baraçaq. Bu eşne oyıştıruçılar, forumda kütärelgän mäsälälär, mäsälän, belem birü säxifäläre belän aqça eçläp bulamı, küpme ikelelelär quyarğa yarıy, invalid balalarnı uqıtu öçen kompyuter programmaları barmı, häm başqa şundıy temalarğa barğan fiker alışular, gomumiläşterelep, notıqlar uqılıp, mäğärif ölkäsendä eşläwçelärneñ eşendä qullanaçaq, dip wäğdä itelä älege säxifädä. Tıñlawçılarıbız arasında uqıtuçılar bulsa, alarda www.tatedu.ru Tatarstan mäğärif ministrlığınıñ internet säxifäse belän tanışıp çığarğa täqdim itä alabız. www.kros.ru häm belem birü portalı - edu.kzn.ru .
Bikä Timerova.
