Xalıqara Qızıl Xaç Komitetı Quşma Ştatlarnıñ Kubadağı Guantanamo törmäsendä totqınnar açlıq tota dip belderde.
Oyışmanıñ baş süzçese Antonella Notari anda xällär awır, häm bez wäzğiätne iğtibar belän küzätep barabız dide.
Notari qayber totqınnar köç belän aşatıla digän xäbärlär turında berni dä äytmäde.
Kiçä Amnesti İnternational oyışması AQŞ xakimiätläre totqınnarnıñ 21-eneñ aşqazanına köç belän köpşä aşa azıq birep tora dip xäbär itkän ide.
Kiçä xoquq yaqlawçılar Britaniäne Guantanamo törmäsendäge wäzğiätkä tıqşınırğa çaqırdı. Açlıq totuda 500-läp totqınnıñ 200-läbe qatnaşa.
