Accessibility links

Кайнар хәбәр

Törki xalıqlar festivalenä äzerlek: “Sember cırı”


Yomğaq konsertı Ul'yanov rayonı üzäge İşeevkanıñ Mädäniät yortında eşläp kilüçe “Aqbars” isemle balalar törkeme çığışı belän başlandı. Älfiä Ramazanova citäkçelegendäge bu törkem balaları çığışı ruslar yäşägän asabada da nänilärgä milli tärbiä birü mömkinlegen rasladı. Yuğisä, ölkä üzägendä tatar balaları bik küp bulsa da, biredäge Tatar mädäni üzäge andıy uñğan kollektivı belän maqtana almıy. Xäyer, monısı inde oyıştıruçınıñ sälätennän häm milli üzañınnan toradır.

Şulay da yäş talantlarıbız, şöker, bar ikänen dä kürsätte bu bäyge. Qarsun rayonınnan Rinat Diarov, Liliä Xakimova, Yaña Malıqlı rayonınnan Liliä Yarullina, İske Kulatqı rayonınnan Älfiä Absattarova, Radik Xisametdinov ozın-ozaq alqışlarğa layıq buldılar. Soñğısı – Radik “Tamaşaçı mäxäbbäte öçen” digän diplomğa da layıq buldı. İnza rayonı qızı Svetlana Nağinağa da üzençälekle büläk tapşırıldı. Çönki anıñ “Yätimnär gimnı” dip täqdim itelgän bäyete zamana öçen bik möhim bit: änise taşlap kitkän qız yazmışı turında ide ul. Bu bäyetneñ tä'sire köçle buluğa tağın ber säbäp bar: anı iğlan itär aldınnan tamaşanı alıp baruçı Räysä Şäkürewa Gakıyl' Säğirewneñ atasız üskän qız xislären yöräklärne teträndererlek itep tamaşaçığa citkerde. Konkurstan tış elekke tanılğan cırçılarıbız Ul'yannan Färhät Vaxitov, Alsu Salaxova, Mäläkästän Raziä Bildanova xalıqnı milli moñıbız belän sıyladılar.

Bäygeneñ maqsatı alda torğan Törki xalıqlar festivalenä qatnaşuçılarnı barlaw ide. 1 – 3 urınnar yaulağan yeget-qızlarıbız qatnaşaçaq anda: Rinat Sadıykov, Çulpan Firğaliewa - ölkä üzägennän häm Fäniä Xäliullina – Mäläkästän.

Tik tamaşaçılar arasında moña rizasızlıq belderüçelär dä buldı. Tanılğan cırçı Qazan radiosı aşa da tulı konsertlar belän çığış yasağan Rinat Sadıykov urınına berär yäş talantnı därtländerü kiräk ide, diüçelär küp buldı. Mäsälän, İske Kulatqı rayonı yegete tamaşaçı mäxäbbäten yaulağan Radik Xisametdinovnı. Ä Rinat qunaq sıyfatında da xalıqnı sıylıy alır ide, dilär.

Şunısın da östäp äytergä kiräkter: şöker, talantlarıbız bar äle. Menä bernindi büläkkä dä, räxmät xatına da layıq bulmağan, 270 çaqrım yıraqlıqtan - İske Qulatqıdan kilgän yäş kenä Älfiä Absattarovanı az ğına tıñlap qarıyq äle. Anı täqdim itär aldınnan alıp baruçı Yaña Malıqlı rayonı üzeşçännäre citäkçese Räysä Şäkürewanıñ tatar cırına mädxiäse dä bik urınlı yañğıradı.

Ayrat İbrahim, Sember

XS
SM
MD
LG