İsemennän kürengänçä, bu çara Qazannıñ meñ yıllığına bağışlanğan ide. Bäyrämgä kilüçelärneñ yäşe çiklänmägän, başlanğıç klass uquçıları, olı yäştäge abıylar-apalar – hämmäse bik teläp qatnaştılar. Şuña kürä kiçä bik küñelle uzdı. Programmanı 63 nçe mäktäpneñ tatar tele häm ädäbiäte uqıtuçısı Zöhrä Xäbibullina başlap cibärde. Ul zalda utıruçılarğa Qazannıñ tarixın söyläde. Şähärneñ barlıqqa kilüen kürsätkän legendalar belän tanıştırıp ütte. Kiçäne alıp baruçı, Gölfiä xanım meñyıllıqqa bağışlanğan videofil'm kürsätte. Rozaliä Matrosova başqaruındağı Söyembikä bäyete dä kübeseneñ küñelenä xuş kilde. İñ quandırğanı, çarada balalarnıñ qatnaşuı. Alar böyek şähärgä bağışlanğan cırlar cırladılar, şiğerlär söylädelär, tatar xalıq biyülären başqardılar.
Noyäber başında şähärebezneñ 15 nçe, 28 nçe mäktäpläreneñ tatar sıynıflarında belem aluçılar arasında Qazannıñ yubileena bağışlanğan konkurslar, viktorinalar uzdırılğan bulğan. Şunda ciñüçelärgä Ul'yan qalasındağı Üzäk kitapxanäneñ mödire Roza xanım Ğimatdinova büläklär tapşırdı. Kiçädä Alsu Säläxova citäkçelegendä eşläp kilüçe «Xıyal» balalar ansamble dä çığış yasadı.
(“Tuğan yaq” cırınnan özek)
Ğomumän alğanda, bäyrämdä Qazan turında ğına tügel, ä ölkäbezdä yäşäwçe millättäşlärebez turında da süz bardı. Mäsälän, Sergey Morozovnıñ ekonomika buyınça kiñäşçese Färit Şakir ulı Äyupov ölkädäge tatarlarnıñ kiläçäge turında süz alıp bardı. Ul Ul'yanovsk ölkäseneñ gubernatorı Sergey Morozovnıñ avtonomiälärgä, kiläse yılğa 4 million Sum aqça bülenep bireläçäge turında äytte.
28 nçe mäktäpneñ tatar tele-ädäbiätı uqıtuçısı Güzäl xanım Safiullina mäktäp, uqu-uqıtu problemaların kütärde. Şulay uq bäyrämdä şağirlär, cämğiät eşlekleläre, maltabarlar qatnaştı.
Çığış yasawçılar arasında Qazannıñ 1000 yıllığı tantanalarında qatnaşuçılar da bar ide. Alar alıp qaytqan tä'sirläre belän büleştelär. Çara “Tuğan tel” cırın kümäk başqaru belän tämamlandı.
Çulpan Firğaliewa, Sember.
