Accessibility links

Кайнар хәбәр

Könyaq Osetiä: Gruziägä qaçqan totqın yaña oppozitsiäne citäklärme?


Könyaq Osetiäneñ elekke eçke eşlär ministrı häm İminlek şurası sekretare Camal Karkusov uzğan atna azağında Tsxinvalidäge törmädän qaçtı. Ul 4 yıllıq törmä cäzasına xökem itelgän ide. Gruziä eçke eşlär ministrı Vano Merabaşvili Karkusovnıñ qaçuı artında Tiflis tora aluına işarä itte. Berük waqıtta ul qaçqınnı kire Könyaq Osetiägä birüne kire qaqtı. Bolar barısı da, Gruziä Camal Karkusovnı Könyaq Osetiäneñ xäzerge xakimiatenä qarşı qullanırğa cıyına digän şik uyata.

Camal Karkusovnıñ, qärdäşe Yan belän bergä Tsxinvali törmäsennän şimbä tönendä qaçuı mäğlüm. Häm monıñ artında Könyaq Osetiäne yänä üz xakimiate astına alırğa telägän Gruziä tora kebek - ikençe könne xäbärçelär belän oçraşqanda gruzin eçke eşlär ministrı Merabaşvili şuña işarä itte. Ul Karkusovlarnıñ qaçuın "böyek ciñü" dip atadı häm şuşı qatlawlı eş äle altı ay aldan uq planlaştırılğan ide, dip belderde. Moñardan tış Vano Merabaşvili, Tiflis Karkusovlarnı kire Könyaq Osetiägä tapşırmayaçaq, çönki "alar säyäsi totqınnar ide, säyäsi säbäplär arqasında qulğa alınğan ide, xäzer isä alar üz watannarında irektä", dip tä östäde. Könyaq Osetiä yağı isä Karkusovlarnıñ qaçuına Gruziäneñ qatnaşı buluın kire qağa, moña barı tik törmä saqçılarınıñ wayımsızlığı ğına ğäyeple, dip belderä. Ä Könyaq Osetiäneñ matbuğat häm mäğlümat komitetı başlığı İrina Gagloyeva, Camal häm Yan Karkusovlarğa Tsxinvalidäge tärtip saqlaw xezmätlärendä eşlägän yäşeren yardämçeläre bulışqan digän farazın äytte:

"İnde başlanğan cinayät eşe Könyaq Osetiä tärtip saqlaw oyışmalarında namussız xezmätkärlär buluın häm qaçu eşenä alarnıñ qatnaşı buluın kürsätä, bez monı yäşermibez. Qayberäwlär inde qulğa alındı häm ğäyeplären tanıdı, qızğanıç ki, bu şulay", di Könyaq Osetiä xökümäte wäkile. Gagloyeva süzlärenä qarağanda, totqınnarnıñ törmädän qaçıp Gruziädä yä başqa cirdä sıyınu ezläwe berençe oçraq tügel. Gruzin ministrı Merabaşvilineñ belderüen isä ul "äkiyät" dip atıy:

"Gruzinnar xalıqnı, bar bu eşne tärtip saqlaw xezmätläre oyıştırğan dip ışandırırğa tırışa, şunıñ aşa alar dönyağa üzläreneñ Könyaq Osetiäne kontrol'' itüen kürsätmäkçe. Bu älbättä mömkin tügel, Gruziä yäşeren xezmätläreneñ moña bernindi dä qatnaşı yuq", dip belderä Könyaq Osetiäneñ matbuğat häm mäğlümat komitetı başlığı Gagloyeva. Mäskäwdäge "Kommersant" basması düşämbedä, Karkusovlar xäzerge waqıtta Tiflistä, Gruziä eçke eşlär ministrlığı yaqlawında, dip yazıp çıqtı. Basma şulay uq, alarnıñ tuğannarına işarä yasap, Karkusovlar ğailäse gruzin xökümätenä Könyaq Osetiäne yañadan Tiflis qaramağına qaytaruğa bulışırğa teli, dip tä yaza. Gruziäneñ bötenlegen torğızunı wäğdä itkän prezident Mixail Saakaşvili küptän tügel genä, Könyaq Osetiägä Gruziä qısalarında kiñ moxtariat garantiälägän yaña plan täqdim itkän ide. Tsxinvali monı kire qaqtı, ä menä Karkusovlar Saakaşvili täqdimen "qızıqlı" häm Könyaq Osetiä mänfäğätlärenä "turı kilgän" dip bäyäli ikän - "Kommersant" şulay yaza. Mäskäw basması şulay uq, Karkusov Könyaq Osetiädä säyäsi maqsatlardan çığıp ezärleklängän diüçe Gruziä xäzer anı Tsxinvalidäge prezident Eduard Kokoityğa qarşı oppozitsiäne citäkläw öçen faydalana ala, digän faraz belderä. Kokoity Rusiä tarafdarı sanalsa, elek eçke eşlär ministrı bulğan, ämma soñraq qanun bozıp qoral saqlaw öçen törmägä xökem itelgän häm xäzer Tifliskä qaçqan Camal Karkusov Gruziä belän yaqınayunı alğa söräçäk dip farazalana.

Kärim Kamal
XS
SM
MD
LG