Çärşämbe könne, Däwlät Şurası qarşındağı yäşlär ictimaği ppalatasınıñ utırışı bulıp uzdı. Yäşlär parlamentı räweşendäge älege yäşlär cıyını, här kem öçen bik möhim mäs’älä, toraq programmaları turında söyläşü alıp bardı.Yäşlär aldında, däwlät oyışmaları wäkilläre çığış yasadı. Yäş iqtisat belgeçe, ictimaği palata ägzäse İlnur Ğäräyev, inde bulğan toraq programmaların çağıştırıp qarap, küzätü yasadı. Anıñ süzlärençä, bügenge köndä, toraq problemasın xäl itü öçen Tatarstanda 3 yul bar : yäş ğailälärgä yärdäm programması, byudjet oyışmalarında eşläwçelär öçen sotsial ipoteka häm ğädäti ipoteka ikän. Yäş ğailälär programmasınıñ berençe kerteme dä zur tügel, fatir bäyäsen dä ozaq yıllar buyı tülärgä bula, ämma, programmağa az aqça birelä, ul bik äkren ütälä. Çiratta 22 meñ keşe tora, ä yılına 1 meñ keşe genä fatirlı bula, dielde xisapta. Sotsial ipoteka, uqıtuçılar, tabiplar häm däwlät eşendä eşläwçelär öçen bik uñay programma digän bäyä birelde. Ämma toraq bäyäse, kredit protsentları, ğädättägedän 2 tapqırğa arzanraq, dip sanalsa da, byudjet oyışmalarında eşläwçelär öçen berençe kertem häm aylıq tüläwlär , kütärerlek tügel ikän. Bu xaqta, parlament utırışında qatnaşqan yäşlär üzläre dä äytte. Çönki, 2 yäş keşeneñ eş xaqları şul xätle tübän ki, ay sayın 3-4 meñne tülärgä häm xucalıq alıp barırğa berniçek tä citmi. Toraq fondı citäkçese, finas xäl awır bulsa, berençe 30% -lik kertemne dä tülämiçä, programmada qatnaşırğa bula, dide. Klassik ipoteka tüläwläre, yäşlär tarafınnan, gomümän kütärerlek tügel,dip tabıldı. Toraq fondı citäkçese Tälğät Abdullinğa, yäşlär, studentlar ni eşlärgä tieş, alar sotsial ipotekada qatnaşa alamı digän sorawnı quydı. Ul, äye, yäşlär, üzläre yäşägän rayonnarında çiratqa yazıla alalar, dip cawap birde. Ämma kreditnı tüläw öçen, alarğa aqçanı tabarğa turı kiläçäk, dide. Tälğät Abdullin. Yäğni, xaqı bar, alaçağı yuq. Sotsial ipotekanıñ yäş ğailälärğä birgän berdänber östenlekle yağı – bala tuu belän, fatirnıñ 18 kvadrat metrı buşlay birelä. Başqa östenleklär yuq. Tözeleş ministrlığı wäkile şulay uq, cıyılışta çığış yasap, älege däwlät oyışmasınıñ qaraşın añlattı. Toraq buşlay birelmäskä tieş, çönki ul waqıtta qädere bulmıy, keşelär däwlättän alıp, annan aqça ğına eşlärgä toralar, dip añlattı. Şuña kürä, fatirlı bulu – ciñel bulmayaçaq, dide. Yäşlär üzläre isä, awır ğına tügel, bulmaslıq, digän näticägä kilde. Sotsial häm ğadi ipoteka, yäş ğailälärgä yärdäm programmaları eşläp kilsä dä, alar bar yäşlärgä turı kilep betmi. Sotsial ipoteka programmasında, uqıtuçı, tabip häm başqa şundıy däwlät oyışmalarında eşläwçelär qatnaşa ala, ä şäxsi şirkätlärdä eşläwçelärneñ finans xälläre, däwlätnekennän ällä ni ayırılmasqa mömkin. Awıldan, başqa şähärdän küçep kilgän keşe, ğädättä yäşäw urını bulmaw kebek problema aldında kilep basa. Xäzer Qazanda, tulay toraqlar citmi, bulğannarı – şığrım tulı. Fatirnı arendağa alıp, xucağa xaqın tüläp yäşärgä qala. Parlament utırışında, yäşlär öçen ciñelräk arenda şartların, sotsial arenda buldıru kebek mäsällär qaraldı. Ämma bolar äle yıraq kiläçäk eşe genä.Yäşlär ictimaği palatası ägzäläre, eşçe törkem tözep, toraq programmalarına yäşlär isemennän teläk-täqdimnär tuplarğa kileşte.
Bikä Timerova
