Accessibility links

Кайнар хәбәр

Sergey Xurtinnıñ Başqortstan prokurorı itep bilgelänüe Semberdä xäwefle farazlarğa säbäp buldı


2003-yılda ĞAİ xezmätkäre citäkçelege astında banditlar törkeme tönge yullarda razbuylar belän xalıqnı xäwefkä salğan ide. Alar totılğaç, nigäder, bu bandağa “Djamaat” iseme birelde. İslam dinen pıçratuğa yunälderelgän bu aksiäne tormışqa aşıruda, cirle möselmannar fikerençä, Sergey Xurtinnıñ da öleşe zur bulğan. Bu vaxxabitlar törkemeneñ wäxşilekläre turında cirle matbuğat 4 märtäbä awız çayqap aldı. Soñğısı – sentäber axırında mäxkämä başlanu uñayınnan. Sud yabıq – däwlät sere kebek bulğanğa, anıñ turında mäğlümätlär yuq. Barı tik İslam kul'tura üzäge filialı citäkçese Röstäm Kamalov häm Ölkäneñ Üzäk diniä nazaräte möftie Fatıyx xäzrät Aliullovnıñ şahit sıyfatında sudqa çaqırılğannarı ğına mäğlüm. Läkin alarnı çaqırunıñ maqsatı da “vaxxabizm närsä ul?” digän sorawğa cawap ezläw belän çiklängän. Bälki vaxxabit ğamälläre dä tabarlar. Ezläsäñ, tabıp bula inde. İslam dinen pıçratu öçen yañadan-yaña isemnär tabıla tora: brat'ya-musul'mane urınına fundamentalist, ekstremist, äl'-qağidä, vaxxabit, xisb-yet-tährir kebek “sügenü süzläre” qullanışqa kerde.

Şul arada “Симбирский курьер” gäzite “Cir şarınıñ böten xalqın pravoslavnıyğa äyländerergä” digän yazma belän çıqtı. Süz cir iärçenendä pravoslav ruxanien oçıru täqdime turında bara. Xäyer, mondıy ğämälneñ başlanğıçı bar inde: yaz könnärendä İrqut ölkäse cirlärenä oçqıçtan “izge su” sibep oçtılar, cäyen Qazan bogomater' ikonası Yaq-40 oçqıçında Sember ölkäse çiklären törle afätlärdä qotqarıp oçıp çıqtı.

Şul uq “Симбирский курьер” “ Qızıl xaç urınına Qızıl romb qullanılaçağı, Mäskäw dairälärendä Rusiä gerbındağı tärelärneñ qanunlığına şik belderülär uñayınnan soñğı arada işetelgän fikerlärgä üz uquçılarınıñ da mönäsäbäten sorağan ide. Cawaplar törleçäräk. Kärimev digän beräw “Miña barıber” dip cawap birgän. Aleksey Şumakov Rusiäneñ pravoslav däwlät ikänen iskä töşerä. İvan Petroviç fikerençä, gerb ul milli tügel, däwläti simvol. Mäsälän, Qazan gerbındağı drakon urıs fol'klorında yawızlıq çığanağı bulsa da, bez bit anı alıp ırğıtunı taläp itmibez, di ul. Şulay da küpçelek täreneñ gerbta buluına qarşı. Şunısı möhim: barısı da - urıs isem- familiälären yörtüçelär.

Petr Zelenovnıñ fikere üzençälekle: “Yäşäw däräcäsenä qarasañ, bezneñ gerb öçen iñ yaxşı simvol – yarıq tağaraq”. Läkin ul “yäşäw däräcäse” digän töşençäne matdi xäl mäğnäsendä genä añlıy. Ruxi yaq möhimräk bulsa da.

“Народная газета”da dönya kürgän “Näni malay üz üleme belän iserek awılnı aqılğa utırttı“ digän yazma, mäsälän, ruxi xalätne açıq tasvirlıy. Ölkä üzägeneñ Yuğarı Terrasa mäçete qarawılçısın üterep, seyftan 5 meñ rubl' aqça urlağannar. Ağımdağı yılda ğına 60 militsiä xezmätkärenä qarata cinayät eşe açılğan.

Mondıy misallar bixisap.

Täre çäçep kenä dingä tartu, äxlaqnı nığıtu mömkin tügelder şul...

Ayrat İbrahim, Sember

XS
SM
MD
LG