Accessibility links

Кайнар хәбәр

Kasparov prezidentlıqqa bara almıy


Garri Kasparov
Garri Kasparov

Rusiädä kiläse yılnıñ martında ütäçäk prezident saylawlarında oppozitsiädän namzät bulır dip kötelgän Garri Kasparov saylawlarda qatnaşmasqa mömkin. Namzät itep täqdim itelü öçen kimendä 500 keşe qatnaşında cıyılış ütkärergä kiräk. Kasparov süzlärençä, aña mondıy cıyınnı ütkärü öçen Mäskäwdä urın birmilär.

Üzäk saylaw komissiäsenä dokumentlar tapşıru öçen soñğı kön itep 18 dikäber bilgelängän. Prezidentlıqqa namzät täqdim itü öçen kimendä 500 keşe qatnaşında cıyılış ütkärergä kiräk. Bu cıyılışnıñ qayda häm qayçan ütäse turında üzäk saylaw komissiäsenä 5 kön aldan xäbär itep quayrğa kiräk. Yağni, atnakiç 13 dikäber -monıñ öçen soñğı kön ide. Garri Kasparov radiobızğa äytüençä, ul Mäskäwdä andıy cıyılış ütkärü öçen urın taba almağan:

"Bügenge köngä bez andıy urın taba almadıq. Küräseñ, Mäskäwdä 500 keşedän kübräk sıydırışlı zallarğa Kasparov cıyılışın ütkärmäskä digän kürsätmä birelgän" dide Garri Kasparov.

Kasparovı namzätlekkä täqdim itü cıyını atnakiç 13 dikäber könne Mir kinoteatrında ütäse bulğan. Läkin soñğı minutta kinoteatr idaräse, texnik problemalar digän sıltaw belän, zalnı birüdän baş tartqan. Berläşkän watandaşlar frontınıñ başqarma komitet citäkçese Denis Bilunov süzlärençä, bu texnik problemalarnıñ närsädän ğibärät ikäne añlaşılmıy. Çönki näq şul zalda, başqa ber nazmätneñ näq şundıy cıyını 9 dikäberdä ütkän, tağın berseneke – 14 dikäberdä ütäçäk.

Mir kinoteatrına qadär Kasparov törkeme Mäskäwdä tağın 5 binağa möräcäğät itep qarağan, berse dä cıyın ütkärergä rizalıq birmägän.

Cıyılışların ütkärä almayaçağın añlağaç, törkem äğzaları üzäk saylaw komissiäse räise Vladimir Çurov isemenä möräcäğät itep, Kaparovnı alarnıñ notariusta raslanğan imzaları nigezendä terkärgä ütengän. Komissiä andıy çığarmağa bara almıybız digän cawap qaytarğan.

Şulay itep, Garri Kasparov saylaw aldı kampaniäsen başlamas borın, anı tämamlarğa mäcbür bulır sıman.

İnde xäbär itkänebezçä, çärşämbedä Peterbur hawa alanında Kasparovnıñ xatını häm qızın, dokumentların tikşerü sıltawı belän, çit ilgä baruçı oçqıçqa utırtmağannar.
XS
SM
MD
LG