Belarusnıñ yäşlär frontı citäkçese 19 yäşlek Zmitser Fedaruk uzğan atnada ğına Quşma Ştatlarda bulıp prezident Buş häm kongressmennar belän oçraşıp qayttı. Çärşämbedä Minskida ütkän tınıç protest çarası waqıtında militsiä tarafınnan añın yuğaltqançığa qädär qıynalıp ul xäzer xastaxanädä yata. Radiobıznıñ belarus bülegenä telefon aşa militsiäneñ üzenä qarata ayıruça iğtibarın ul Amerikağa baruı belän bäyläde:
Qıynaluım Amerikağa baru belän bäyle dip uylıym. Moña işarälär küp. Mine başqalardan ayırıp OMON kordonı artına çığarıp qıynadılar. Annarı "mägez yegetegezne, ul Amerikağa yaxşı ğına barıp qayttı" dip kire taşladılar, dide ul.
Fedaruk häm tağın 200läp keşe Putinnıñ Minskiğa säfäre aldınnan Belarusnıñ Rusiä belän ixtimal quşıluına qarşı protest çarası ütkärde. Mäğlümät çaraları ike prezidentnıñ oçraşuında quşılu mäsläse dä kütärelergä mömkin digän xäbärlär taratqan ide.
Quşma Ştatlarnıñ Belarustağı ilçese Karen Steward Belarus räsmiläreneñ Fedaruk häm başqa protest belderüçelrga qarata qılğan ğämällärenä tänqit belderde:
"Mondıy räximsez ğamällär räsmilärneñ tınıç protestlarğa qarata fikere üzgärmäwen kürsätä. Räsmi Waşington bu uñaydan tirän borçılu belderde, häm bez Belarus räsmilären zıyan kürüçelärgä bar kiräkle meditsina yärdäme kürsätergä çaqırabız" dide Quşma Ştatlarnıñ Belarustağı ilçese.
Karen xanım süzlärençä, Belarus yağında üzgäreş küzätelmäsä, Quşma Ştatlar Belarusnıñ räsmi oyışmalarına qarata östämä çaralar kürergä mömkin.
2006 yıl prezident saylawları waqıtında oppozitsiä qırıs bastırılğannan soñ Quşma Ştatlar häm Yewropa Berlege Aleksandr Lukaşenka häm Belrausnıñ başqa räsmilärenä üz illärenä kerüne tıyğan ide.
Räsmi Waşingtonnıñ teläktäşlek belderüenä Fedaruk yuğarı bäyä birde. Zıyan kürüçe min genä tügel, Zmitser isemle tağın ber yegetneñ ayağı sınğan, Palina isemle qıznıñ barmağı sınğan dide ul.