Accessibility links

Кайнар хәбәр

Saakaşvili ciñde. Köç-xäl belän


Mixail Saakaşvili Raştua yolasında, Tiflis, 07.12.2008
Mixail Saakaşvili Raştua yolasında, Tiflis, 07.12.2008

Räsmi mäğlümätlärgä qarağanda, uzğan şimbä Gruziädä ütkän şaw-şulı saylawda xäzerge prezident Mixail Saakaşvili berençe turda uq ciñergä oşağan. Läkin anıñ östenlege bik keçkenä buluı häm dä başqala Tiflistä ottıruı xalıqta aña qarata bulğan xuplawnıñ şaqtıy kimüen kürsätä.


Gruziäneñ üzäk saylaw komissiäse düşämbedä tawışlarnıñ 2/3-sen sanağannan soñ, Mixail Saakaşvili 52% çaması belän berençe urında, anıñ töp köndäşe Levan Gaçeçiladze 25% belän ikençe urında, dip iğlan itte.

Berençe turda uq ciñü öçen Saakaşviliğa tawışlarnıñ kimendä 50% kiräk. Saylaw komissiäse räise Levan Tarxinişvili bu näticälär ällä ni üzgärmäs, ikençe turnıñ kiräge bulmas, digän belderü yasadı.

Şulay itep, Mixail Saakaşvili üze iğlan itkän häm aña ışanıç belderü dip qaralğan bu saylawnı ciñep çığarğa oşağan. Läkin bik zur awırlıq belän. Ä başqala Tiflistä ul ğomumän ciñelü kiçergän. 10 bülgeneñ 8-ndä anıñ köndäşe ciñgän.

"Älbättä min annan kübräkne kötkän idem. Saakaşvili bik äwzen kampaniä alıp bardı. Min anı Tiflistä ciñeler dip uylamağan idem" di säyäsi küzätüçe Aleksandr Rondeli.

Belgeçlär fikerençä, bu saylaw tarixqa ike närsäse belän kerep qalaçaq. Berençedän, elekkelärennän ayırmalı bularaq, bu yulı berdän-ber köçle namzät yuq ide, çın säyäsi köräş bardı.

İkençedän, xalıqara küzätüçelär aña iñ yuğarı bäyä birde. Yewropada iminlek häm xezmättäşlek oyışması qayber tärtip bozularnı tanısa da, bu saylaw xalıqara taläplärneñ kübesenä cawap birde, digän näticä yasadı.

Oppozitsiä, monıñ belän kileşmi, xakimiätne, ikençe turnı buldırmas öçen, xärämläşüdä ğayepli, tawış birü waqıtında küp sanlı tärtip bozular buluın belderä häm 8 ğinwardan qarşılıq çaraları başlarğa cıyına.

Ämmä Rondeli fikerençä, bu qarşılıq çarası başlansa da, ozaqqa barmayaçaq. Gruzinnar uram cıyınnarınnan arıdı, östäwenä, Saakaşvili belän Gaçeçiladze ul qädäre köçle qarşılıqqa barmayaçaq, di uzğan töndä alarnıñ Raştua yolasında bergä basıp toruın küzätkän Aleksandr Rondeli.

"Kiçä Sameba çirkäwendä Saakaşvili Gaçeçiladzenıñ qulın qıstı, tegese yılmayıp säläm qaytardı. Bu bik ömetle küreneş, Gruziädä säyäsi kulturanıñ urın aluın kürsätä" di Aleksandr Rondeli.

Prezident saylaw belän bergä şimbä könne ike fiker beleşü dä ütkärelgän. Bersendä parlament saylaw qayçan ütsen – yazdamı, közdäme, digän soraw birelgän, ikençesendä – saylawçıdan Gruziäneñ NATOğa kerünä qarata fikere soralğan.

Saylaw komissiäse älegä räsmi sannarnı iğlan itmäde. Ämmä exit-poll näticälärenä qarağanda, xaılqta NATOğa kerüne xuplaw şaqtıy kimegän, 60% çaması qalğan.

Säyäsät belgeçe Aleksandr Rondeli monı xalıqta Saakaşvili säyäsätenä bulğan qänäğätsezlek belän añlata.

"Axırsı bu ğomum qänäğätsezlek näticäse. Ägär xökümät teli ikän, bez qarşı tawış biräbez, digän kebek. Bu bik tiskäre näticä" di Aleksandr Rondeli.

Niçek kenä bulmasın, belgeçlär fikerençä, bu saylaw belän Gruziä yaña säyäsi çorına kerä – säyäsi törlelek çorına. Monı xalıqnıñ şaqtıy yuğarı qatnaşu däräcäse dä kürsätä di alar. Räsmi sannarğa qarağanda tawış birüdä saylawçılarnıñ 60%-tı qatnaşqan.

XS
SM
MD
LG