Soñğı 3 köndä Mixail Saakaşvilinıñ üzen totışı şaqtıy üzgärde, diärgä bula. Moña qädär çaya bulıp kürengän häm gel üzeneken alğa sörgän säyäsätçe köç-xäl belän ikençe turdan qotılıp qalğannan soñ süzlären ülçäp äytä, köndäşlärenä xezmättäşlek täqdim itä başladı.
Sişämbedä televidenie äñgämäse waqıtında ul yaña xökümätkä "kiñräk dairädän" säyäsätçelär keräçäk dip, küplärne ğäcäpkä qaldırdı. Moña qädär "bu saylaw cämğiättä fiker törelelegen kürsätte, bezgä tawış birmägännärneñ fikeren bez kire qağa almıybız" digän süzlär äytkän ide.
Gruziäneñ säyäsi säxnäsendäge bu üzgäreşlärgä Könbatış räsmiläre saq qına qänäğätlänü belderä.
"Gruziädäge bar taraflarğa – xökümätme ul, oppozitsiäme – äytäse kilgän şul: inqilab tämam, xäzer demokratik institutlar tözü öçen citdi häm awır eş waqıtı citte. Uram qağidäse tügel, qanun qağidäse çorı. Läkin tınıç qarşılıq çaraları da demokratiäneñ ber öleşe" dide Quşma Ştatlar däwlät sekretareneñ Yewropa häm Yewraziä eşläre yärdämçese Matthew Bryza.
Tağın ber kisken üzgäreş – yaña prezidentlıq möddäten Saakaşvili olı kürşese Rusiä belän mönäsäbätlärne rätkä saludan başlaw niäten belderde. Rusiä prezidentı Vladimir Putinnı wazğifağa kerü tantanasına çaqırğanın äytte. Putinnıñ prezident sıyfatında Gruziädä äle bulğanı yuq.
Şuşı üzgäreşlär Saakaşvilinıñ berençe möddäte waqıtında täqrarlanğan, Rusiä qanatı astınnan çığıp, NATO häm Yewropa Berlegenä kerü maqsatınnan waz kiçüne añlatmıymı?
Stokholmdağı İminlek häm säyäsi üseş institutı belgeçe Svante Cornell fikerençä – yuq.
"Gruziäneñ NATO belän xezmättäşlege ildäge häm töbäktäge iminlekne nıq yaxşırtaçaq, çönki bu oçraqta Gruziä Yewropanıñ iminlek sistemına totaşa häm Rusiäneñ teläklärenä azraq bäyle bulaçaq, ä alar şaqtıy" di Svante Cornell.
Könbatış häm ayırım alğanda Quşma Ştratlarnıñ kiläçäktä Gruziägä iğtibarı ni däräcädä bulır – äytüe qıyın. Oppozitsiä belän küpmeder bäyläneşe bulsa da, Waşingtonıñ märxämäte moña qädär kübräk Saakaşvili yağında ide. Xäzer Amerikanıñ üz mäşäqätläre, citmäsä bıyıl - saylaw yılı. Bu xalättä anıñ Gruziägä därte dä därmanı da qalmasqa mömkin.