Dmitriy Rogozinnı Brusselgä cibärep Kreml ber atuda ike quyannı üterä. Beryaqtan, Könbatışqa işarä yasıy, ikençe yaqtan, mäşäqätle säyäsätçedän arına.
Üzen urıs xalqı xoquqların qaynar yaqlawçı itep tanıtqan 44 yäşlek bu säyäsätçe, Rusiäne kilmeşäklärdän tazartırğa çaqırğan şiğärläre, şuña öndägän uram cıyınnarı belän tanılğan ide.
Ul Könbatışnıñ da qaynar tänqitçese sanala, 2 yıl çaması elek NATOnı "ülä baruçı oyışma" dip atağan ide. Şundıy keşene wäkil itep NATOğa cibärü säyer kürensä dä, belgeçlär fikerençä, bu Kremlneñ mänfäğätlärenä täñgäl turı kilä.
Fedor Lukyanov, "Dönya säyäsätendä Rusiä" jurnalı möxärrire"Bu bilgeläw Rusiäneñ NATOnıñ ğamälläre, bigräk tä könçığışqa taba kiñäyüe belän qänäğät bulmağanın kürsätüçe işarä bulıp tora" di "Dönya säyäsätendä Rusiä" isemle jurnal möxärrire Fedor Lukyanov.
Rusiä räsmiläreneñ kübese NATOnı Quşma Ştatlar häm Yewropanıñ Rusiägä basım yasaw çarası itep kürä. Küräseñ, Rogozin NATOğa qarata bulğan şuşı qarşılıqnı ğäwdäländerergä tieş bulaçaq.
Monnan tış, ul Kosovo mäsäläsendä dä Kreml qaraşın alğa sörä, yağni bu töbäkneñ bäysezlegenä qarşı. NATOğa wäkile itep bilgelängän oçraqta, ul Serbiä mänfäğätlären yaqlayaçağın aldan äytep quydı.
"Älbättä Rogozin sälätle säyäsätçe, anıñ şaqtıy küpkä ireşä alaçağı añlaşılğaç, anı säyäsättän çitlättelär. Läkin oppozitsiägä küçkäç tä, ul Putinğa qarata uñay qaraşta qaldı. Bu bilgelänü Putinnıñ da aña ışanuın kürsätä" di Fedor Lukyanov.
Rodina firqäseneñ Mäskäwne kilmeşäklärdän tazartırğa çaqırğan ber klibı millät-ara näfrät quzğata dip tabılğannan soñ, 2005 yılda bu firqä Mäskäw duması saylawınnan çitlätelde.
Läkin küzätüçelär fikerençä, çınbarlıqta Rogozin ul qädäre "suğış çuqmarı" tügel, Brusselgä barğaç anıñ "cırı" şaqtıy üzgäräçäk.
"Ber qurqınıç närsä dä bulmayaşaq. Berençe ğäcäplänüdän soñ, barısı da urınına utıraçaq. NATOğa qarata säyäsät Brusseldäge ilçe tarafınnan tügel, ä Kremldä xäl iteläçäk. Rusiä-NATO mönäsäbätläre tışqı yaqtan yaxşı, çınbarlıqta naçar. Bu xalät saqlanaçaq" di Fedor Lukyanov.
Mäskäw universitetında jurnalistika uqığan Rogozin tärcemäi xälendä ingliz, fransuz, italian, ispan tellären beläm, dip yazğan.
Rusiäneñ NATOda ilçese wazifasında ul 58 yäşlek general Konstantin Totskiynı alıştıra.